Արցախն ասում է՝ երեխաներ են մահանում, հաց չունենք, Երևանն ասում է՝ գնացեք դա Բաքվին ասեք․ Մամիջանյան
«Արդեն ավանդություն է դարձել, որ Փաշինյանի ցանկացած ստերի չափաբաժնից հետո ստիպված ենք հանդես գալ դրանց հերքումներով»,- այսօր տեղի ունեցած ասուլիսում նշեց ԱԺ «Պատիվ ունեմ» խմբակցության ղեկավար, ՀՀԿ անդամ Հայկ Մամիջանյանը:
Անդրադառնալով Նիկոլ Փաշինյանի հուլիսի 25-ի ասուլիսին, պատգամավորն ասաց, որ նա ևս մեկ անգամ խոսեց Բաքու-Ստեփանակերտ ուղիղ բանակցությունների մասին, բայց ցանկացած նման պնդում պետք է համադրել մեկ կարևորագույն փաստի հետ, որ ՀՀ այս պահի կառավարիչները հայտարարել են՝ Արցախը ճանաչում են Ադրբեջանի մաս, ուստի ցանկացած կոչ Բաքվի և Ստեփանակերտի միջև ուղիղ բանակցությունների վերաբերյալ՝ ենթադրում է ոչ ուղղահայաց տրամաբանությամբ բանակցություններ։
«Այսինքն, այն, ինչի մասին երազում է Բաքուն: Այլ կերպ ձևակերպեմ. Արցախն ասում է՝ մենք բլոկադայի մեջ ենք, երեխաներ են մահանում, հաց չունենք, իսկ պաշտոնական Երևանն ասում է՝ գնացեք դա Բաքվին ասեք: Այլ կերպ սա մեկնաբանել պարզապես հնարավոր չէ: Ինչպե՞ս կարող են տեղի ունենալ ուղիղ բանակցություններ Բաքվի և Ստեփանակերտի միջեւ, եթե կոչ անողը ճանաչել է Արցախն Ադրբեջանի կազմում»,- ընդգծեց Հայկ Մամիջանյանը:
Նա նաև ասաց, որ չի ուզում նույնիսկ անդրադառնալ Փաշինյանի այն հայտարարությանը, երբ 2020 թվականի նոյեմբերի 9-ի փաստաթուղթը ներկայացնում էր տարբեր թվերով՝ 20, 25, 30 հազար զինվորի կյանք փրկելու որոշում։ «Ավելին, նաև ասաց, որ դրանով պետությունն է փրկել։ Ես վստահ եմ, որ մի օր էլ կասի, թե աշխարհը միջուկային աղետից է փրկել: Բայց կուզեմ իրեն հիշեցնել, որ նոյեմբերի 9-ի փաստաթղթից հետո եղել է Ադրբեջանի ագրեսիան Սև լճի տարածքում, Սյունիքի, Ջերմուկի նկատմամբ, ուստի պետություն փրկելու մասին Փաշինյանն իրավունք չունի խոսել»,- նշեց Հայկ Մամիջանյանը։
Նա նաև անդրադարձավ Նիկոլ Փաշինյանի այն հայտարարությանը, թե Արցախն իբր վաղուց ճանաչվել էր Ադրբեջանի մաս։
«Անգամ միջազգային գործընկերները, մասնավորապես, Ժոզեպ Բորելն է խոսել դրա մասին՝ Փաշինյանը Հայաստանի առաջին ղեկավարն էր, որը Արցախը ճանաչել է Ադրբեջանի կազմում: Նախորդիվ բոլոր դեպքերում, երբ խոսվել է Ադրբեջանի տարածքային ամբողջականության մասին, որպես միավոր կամ որպես տարածքային ամբողջականություն, ընկալվել են այն սահմանները, որով Ադրբեջանն անկախացել է ԽՍՀՄ-ից, այսինքն՝ առանց Արցախի: Ուստի զուգահեռներ տանել այդ հայտարարությունների միջև, մեղմ ասած, դավաճանություն է»,-ասաց պատգամավորը։
Հայկ Մամիջանյանի խոսքով՝ իր մոտ այնպիսի տպավորություն է, որ Նիկոլ Փաշինյանն օր ու գիշեր նստած համացանցում փնտրում է ինչ-որ բան, որպեսզի Արցախն Ադրբեջանի կազմում ճանաչելու մեղքը բարդի ինչ-որ մեկի վրա։
«Գտնում է Պետդեպի ինչ-որ անհասկանալի փաստաթղթեր, զեկույցներ, ելույթներ, հրապարակային հայտարարություններ համանախագահ երկրների ներկայացուցիչների կողմից ու ասում՝ ես ինչ անեմ, տեսեք, որ վաղուց դա արդեն իսկ իրականացված է։ Եւս մեկ անգամ հիշեցնում եմ՝ եղել է հինգ հայտարարություն Մինսկի խմբի համանախագահ երկրներից ղեկավարների կողմից։ Հիմա համադրեք նախագահի հայտարարությունը և Պետդեպի ինչ-որ զեկույց։ Կարծում եմ՝ ակնհայտ է այդ երկուսի տարբերությունը։ Եւ այդ բոլոր հայտարարություններում ինքնորոշման իրավունքը հստակ արձանագրվել է։ Ուստի այդ մանիպուլյացիաներն իր գուգլային որոնման արդյունքն են»,- նշեց Հայկ Մամիջանյանը։
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
