Ձեր վստահելի աղբյուրը

Հայաստանից Արցախ ուղարկված 400 տոննա հումանիտար բեռը՝ 19 բեռնատար մեքենա, արդեն 24 ժամ կանգնած է Սյունիքի մարզի Կոռնիձոր գյուղի սահմանային հատվածում ՝ Լաչինի միջանցք տանող ճանապարհին։

60 տոննա շաքարավազը, 40 տոննա ձեթը, 100 տոննա ալյուրը, 80 տոննա մակարոնեղենը, 20 տոննա աղը, 40 տոննա կաթի փոշին, 12 տոննա մանկական սնունդը եւ 9 տոննա դեղորայքն ավելի քան 227 օր շրջափակման մեջ գտնվող արցախցիներին հասցնելու համար հայկական կողմը դիմել է ՌԴ խաղաղապահ զորակազմին եւ ադրբեջանական կողմին, սակայն դեռեւս ապարդյուն․ երկու կողմերից էլ որեւէ պատասխան չկա։

«Կարող ենք ասել՝ քար լռություն է»,- լրագրողների հետ զրույցում նշել է ԼՂ հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը:

NEWS.am-ի հետ զրույցում Արցախի Մարդու իրավունքների պաշտպան Գեղամ Ստեփանյանն ասել է, որ այս պահին բեռներն Արցախ հասցնելու ջանքերը որևէ արդյունք չեն տվել։

«Փորձ է կատարվում անցումն ապահովելու համար, սակայն ադրեբաջանական կողմը կառուցողական մոտեցում ցույց չի տալիս, բանակցությունների մեջ չի մտնում։ Ռուսները փորձում են հնարավորություն ստեղծել բեռների տեղափոխման համար, սակայն դեռեւս ոչ մի արդյունք»,- նշել է Ստեփանյանը։

Իրադարձությունների զարգացմանը տեղում հետևում է Եվրամիության դիտորդական առաքելության ղեկավար Մարկուս Ռիտերը։

«Լուրեր»-ի հետ զրույցում նա ասել է, որ առաքելությունը շուրջօրյա ռեժիմով լինելու է Կոռնիձորի սահմանային հատվածում եւ շարունակելու է մնալ այնքան ժամանակ, քանի դեռ հարցը որեւէ կերպ չի լուծվել: