Ձեր վստահելի աղբյուրը

«Ադրբեջանը խոչընդոտում է  հումանիտար բեռների մուտքը Լաչինի միջանցք, Լեռնային Ղարաբաղ։ Այս գործելակերպն անհասկանալի է և անընդունելի»,- կառավարությա նիստում  հայտարարեց Նիկոլ Փաշինյանը։

Նա հիշեցրեց, որ ԼՂ (Արցախի Հանրապետություն-խմբ.) հումանիտար ճգնաժամի պայմաններում ԼՂ ժողովրդին աջակցության կառավարման աշխատանքային խմբի որոշմամբ երեկ 361 տոննա հումանիտար օգնություն է  ուղարկվել ԼՂ 19 բեռնատար ավտոմեքենաներով։ Օգնությունը երեկ հասել է Սյունիքի մարզի Կոռնիձորի հատված՝ Լաչինի միջանցքի  մուտքի հատված։
«Մենք խնդրել ենք, որ Լեռնային Ղարաբաղում տեղակայված ՌԴ խաղաղապահ զորախմբի ներկայացուցիչներն ընդունեն բեռը,  տեղափոխեն ԼՂ, որտեղ Լաչինի միջանցքի շուրջ  8 ամիս ապօրինի արգելափակված լինելու հետևանքով հումանիտար  ճգամնաժամ է  հաստատված»,- ասաց Փաշինյանը։

Նրա խոսքով, Լաչինի միջանցքն ապօրինի արգելափակելու Ադրբեջանի պատճառաբանությունն այն էր, թե իբր  ՀՀ միջանցքն օգտագործում է ռազմական նպատակներով։

«Սա անհեթեթ պնդում է, բայց այդ պնդումն  օգտագործվում էր որպես պատրվակ Լաչինի միջանցքի ապօրինի արգելափակման համար։ Երեկ ԼՂ ուղարկված 19 բեռնատարների պարունակությունն է՝ ալյուր, մակարոնեղեն, շաքարավազ, բուսական յուղ, կաթի փոշի, աղ, մանկական կեր, դեղորայք։

Երևանից շարժվելուց առաջ ՀՀ-ում հավատարմագրված օտարերկրյա դիվանագետները հրավիրվել ու ծանոթացել են բեռնատարների պարունակությանը։  Ինչո՞ւ Ադրբեջանը թույլ չի տալիս այդ բեռների մուտքը ԼՂ, մի՞թե ոչ այն պատճառով, որ Ադրբեջանի իրական նպատակը ԼՂ ժողովրդին սովի մատնելն է, ցեղասպանության ենթարկելը:

Անկախ մեր գնահատականներից, սակայն սպասում ենք ՌԴ խաղաղպահ զորախմբի, պաշտոնական Բաքվի դրական արձագանքին, որովհետև հումանիտար բեռի մուտքը թույլ չտալը, ընդամենը կհաստատի ԼՂ-ում ցեղասպանություն իրականացնելու Բաքվի մտադրության մասին մտավախությունները։

Լաչինի միջանցքի մուտքի մոտ սպասող հումանիտար բեռների մուտքը Լեռնային Ղարաբաղ կնպաստի տարածաշրջանում խաղաղություն հաստատելու ջանքերին, դրական քայլ կլինի վստահության մթնոլորտի հաստատման ճանապարհին»,- ասաց Փաշինյանը: