Ձեր վստահելի աղբյուրը

«Միջազգային հումանիտար զարգացման» հասարակական կազմակերպությունն այսօր Երևանում մեկնարկել է  «Զարգացման առաջնորդներ» դպրոցը, որը երկարաժամկետ բնույթ է ունենալու և միավորելու է տարբեր ոլորտների ակտիվ երիտասարդների, որոնք պատրաստ են իրենց ողջ ներուժը ներդնել երկրի զարգացման համար:

Երիտասարդների հետ հանդիպմանը ՀԿ նախագահ Արման Ղուկասյանը, ներկայացնելով ծրագրի մանրամասները, կոչ է արել բոլորին միավորվել հանուն այդ գաղափարի:

«Հայաստանն ունի ակտիվ երիտասարդների կարիքը: Մեր գլխավոր նպատակն է այս ծրագրի միջոցով գտնել տարբեր ոլորտներ ներկայացնող երիտասարդներին, միավորել, լսել նրանց և փորձել ուղորդել իրենց ներուժը իրապես երկրի զարգացման համար ուղղված ծրագրեր մշակելու ու իրագործելու ճանապարհին»,- ասել է  նա՝ կարևորելով սերնդափոխության գաղափարի կյանքի կոչումը:

Նա տեղեկացրել է, որ աշնանը նախատեսվում է անցկացնել «Զարգացման առաջնորդների» մեծ համաժողով, որին մասնակցելու հնարավորություն կունենան երիտասարդներ ՀՀ բոլոր մարզերից.
«Երկրում փոփոխությունները հնարավոր են և մեզանից յուրաքանչյուրը կարող է այդ փոփոխությունների առաջնորդը լինել»:

«Միջազգային հումանիտար զարգացման» ՀԿ փոխնախագահ Ծովինար Կոստանյանը ևս հորդորել է երիտասարդներին լինել ակտիվ։

«Վստահ եմ, որ եթե երկրում լինեն թեկուզ հարյուր գիտակից մտածող երիտասարդներ, ովքեր կապում են իրենց ապագան Հայաստանի հետ և Հայաստանի զարգացման հստակ տեսլական ունեն, ովքեր գոհ չեն այն ամենից, ինչ տեղի է ունենում իրենց շուրջ, ապա հնարավոր է բեկում մտցնել և տանել երկիրը ճիշտ ուղիով: Կարևոր է հավատալ սեփական ուժերին, վստահ բարձրացնել սեփական ձայնը, կարծիք հայտնել տեղի ունեցող գործընթացների և զարգացումների վերաբերյալ, և մեր դպրոցը հենց այն հարթակն է, որ տրամադրում է այդ հնարավորությունը»,- ասել է Կոստանյանը։

Ըստ նրա, փոփոխությունները հնարավոր են և առաջնագծում կարող է լինել յուրաքանչյուրը:

ՀԿ-ից հայտնում են, որ հանդւպման ընթացքում 18-35 տարեկան մասնակիցների համար հայտարարվել է մրցույթ, որի շրջանակում երիտասարդները կներկայացնեն Երևան քաղաքի զարգացման իրենց տեսլականը: Սեպտեմբերին մրցույթը կամփոփվի, իսկ հաղթողները կպարգևատրվեն: