Ձեր վստահելի աղբյուրը

Սյունիքի մարզի Կոռնիձոր բնակավայր՝ Լաչինի միջանցքի սկզբնամաս այցելած Հայաստանում հավատարմագրված դիվանագիտական կորպուսի ներկայացուցիչներին Սյունիքի մարզպետ Ռոբերտ Ղուկասյանը նախ տեղեկացրեց, որ Ադրբեջանը փակել է դեպի Արցախի Հանրապետություն հումանիտար բեռների ճանապարհը։

«Ձե աչքով եք տեսնում` ինչպես է Ադրբեջանը փակել հումանիտար բեռների ճանապարհը։ Այս մեքենաները տևական ժամանակ գտնվում են այստեղ, անհնար է հումանիտար բեռների տեղափոխումը սահմանից այն կողմ, դեպի 120 հազար բնակիչներ։ Այնտեղ մարդիկ, երեխաները քաղցած են»,-ասաց նա։

Ռ.Ղուկասյանը նշեց, որ  Ադրբեջանի կողմից կա արձագանք. «Խոսում են ինչ-որ ինտեգրացիայի մասին, բայց արդյո՞ք  այդ ինտեգրացիային սովամահության ճանապարհով են ուզում հասնել։ Դա անընդունելի է բոլորիս համար։ Դա ճանապարհ չէ, մարդիկ սոված են։ Լաչինի միջանցքը միակ ճանապարհն է, որով հումանիտար բեռը պետք է հասնի այն մարդկանց, որոնք անհամբեր սպասում են, անհրաժեշտ է նրանց, այլապես բոլորս լուռ ականատես ենք լինելու, թե ինչպես է իրավիճակը ամեն վայրկյան վատթարանում։

Այն մոտեցումը, որ մարդկանց, այդ թվում երեխաներին սոված պահելու միջոցով ինչ-որ նպատակի են հասնում, չի կարող ընդունելի լինել ժամանակակից աշխարհում»։

Սյունիքի մարզպետի խոսքով, Հակարի կամրջի ամբողջ երկայնքով տեղակայված են ադրբեջանական զորքերը և խորությամբ նույնպես։

«Վերլուծությունները թողնում եմ ձեզ։ Քաղցած, դեղորայքի կարիք ունեցող տասնյակ հազարավոր մարդիկ կամրջի այն կողմում են, բեռներն այս կողմում»,- ասաց Ռ.Ղուկասյանը։