Ձեր վստահելի աղբյուրը

«Դիվանագիտական կորպուսի ներկայացուցիչները Սյունիքում են՝ տեսնելու հումանիտար բեռը, տեսնելու, որ Ադրբեջանն արգելափակում է Լաչինի միջանցքով բեռների անխափան մուտքը Լեռնային Ղարաբաղ»,- Կոռնիձորում լրագրողների հետ ճեպազրույցում ասաց փոխարտգործնախարար Վահան Կոստանյանը։

Նա նշեց, որ այս պահի դրությամբ որևէ դրական զարգացում չկա։

Իրավիճակին տեղում ծանոթանալու նպատակով Կոռնիձոր այցելած ՀՀ-ում հավատարմագրված դիվանագետների ներկայությամբ ասուլիսում Կոստանյանն ասաց, որ Արցախի Հանրապետությունում ճգնաժամը շարունակում է ահագնանալ. «Լեռնային Ղարաբաղի (Արցախի Հանրապետություն-խմբ.) 120 հազար բնակիչ դեկտեմբերի 12-ից սկսած արդեն ավելի քան 220 օր գտնվում են փաստացի շրջափակման մեջ։

Այդ շրջափակումն ուղեկցում է հումանիտար լրջագույն խնդիրներով։ Ադրբեջանի կողմից արդեն մի քանի ամիս է ԼՂ-ում խափանված է  էլեկտրամատակարարումն ու գազամատակարարումը, ինչը լրջագույն խնդիրներ է առաջացրել տեղում։ Արդեն տևական ժամանակ է  ԼՂ-ում կա սննդի, դեղորայքի լրջագույն պակաս։ Բոլոր իրավունքները, որոնք մարդիկ պետք է ունենան, շարունակվում են ոտնահարվել Լեռնային Ղարաբաղում։

Դժվար է  պատկերացնել, որ նման պարագայում միջազգային հանրությունը չի մեկտեղելու իր ջանքները՝ մեկ ճակատով փորձելու լուծել հումանիտար ճգնաժամը, որը ժամ առ ժամ ահագնանում է  ԼՂ-ում։

Բաքուն ԼՂ ժողովրդի համար կյանքի հետ անհամատեղելի պայմաններ է ստեղծում, փոխանցեք սա ձեր երկրների»։

Նա հույս հայտնեց, որ այն, ինչ դիվանագետները տեսնում են այստեղ, հստակորեն կփոխանցեն իրենց մայրաքաղաքներ, որոնք էլ հանդես կգան համապատասխան հայտարարություններով և գործողություններով, ինչը թույլ կտա օր առաջ ապաշրջափակել Լաչինի միջանցքը։ 

Հայաստանի կառավարությունը հուլիսի 26-ին 361 տոննա հումանիտար օգնություն է ուղարկել Արցախի Հանրապետություն՝ 19 բեռնատար ավտոմեքենաներով: Հումանիտար օգնությունը հուլիսի 26-ին հասել է Լաչինի միջանցքի մուտքի հատված: Հայաստանը խնդրել է, որ Արցախում տեղակայված ՌԴ խաղաղապահ զորախմբի ներկայացուցիչներն ընդունեն բեռն ու տեղափոխեն Արցախ, սակայն Ադրբեջանը մինչ այս պահը խոչընդոտում է մարդասիրական օգնությամբ բեռնատարների մուտքը։

Արցախը շուրջ 8 ամիս  ապօրինի շրջափակված է Ադրբեջանի կողմից, ինչի հետևանքով հումանիտար ճգնաժամ է Արցախի Հանապետությունում: