Ձեր վստահելի աղբյուրը

«ԼՂ համար նախատեսված հումանիտար բեռը դեռ Կոռնիձորի սահմանային հատվածում է»,- «Լուրեր»-ի հաղորդմամբ, այս մասին ասել է ԼՂ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը։ Նա նշել է, որ բեռնատարները կանգնած են, տեղաշարժ չկա, տեսանելի հեռավորության վրա Լաչինի փակ միջանցքն է:

Դիվանագետների ու միջազգային կառույցների ներկայացուցիչների` Կոռնիձոր այցն, ըստ Սարգսյանի, լավ հնարավորություն էր, որ նրանք ականատես լինեն` չնայած պնդումներին, թե Լաչինի միջանցքը բաց է բեռնատարների և մարդկանց տեղաշարժի համար, այն փաստացի փակ է:

Սարգսյանի խոսքով, այս այցը կնպաստի, որ միջազգային գործընկերները իրավիճակն արդեն շատ ավելի լավ և հանգամանալից պատկերացնեն:

«Մեր հիմնական նպատակը մնում է նույնը, հումանիտար բեռը ԼՂ տեղափոխելու մասով մեր ջանքերը շարունակական են, հուսանք` արձագանքները կվերածվեն ավելի գործուն քայլերի, և այս ամենը կնպաստի հումանիտար բեռը ԼՂ տեղափոխելու հարցին»,- ասել է նա:

Արդյո՞ք Ադրբեջանից արձագանք եղել է հարցին ի պատասխան նա ասել է. «Ադրբեջանից մինչ այս հնչող արձագանքները որևէ կերպ «կառուցողական» անվանել հնարավոր չէ, հաճախ դրանք կրում են սադրիչ բնույթ, և այն մեղադրանքները, որ հայկական կողմն է դիմում սադրանքի` հումանիտար բեռը ԼՂ տեղափոխելու գործընթացում, ըստ երևույթին, հակառակ կերպ կարելի է ընկալել, որովհետև մեր կողմից իրականացվող բացառապես հումանիտար գործընթացը հանդիպում է սադրիչ և ոչ կառուցողական արձագանքի հենց Ադրբեջանի կողմից»:

Նա հավելել է, թե պատասխանները հիմնականում ոչ կառուցողական են: Ռուսական կողմի արձագանքներին անդրադառնալով` Սարգսյանը նշել է.  «Ինչպես գիտեք, ռուսական կողմից բազմիցս արդեն նշված մեր սահմանված կարգով դիմումի արձագանքի սպասումն է»: