Ձեր վստահելի աղբյուրը

Կարմիր խաչի միջազգային կոմիտեի հայաստանյան գրասենյակի ղեկավար Թիերի Ռիբոն ընդունել է կազմակերպության մոտ ակցիա անող արցախից երիտասարդներին, հասցեագրվել են այն խնդիրները, որոնք հնչեցվել են երիտասարդների կողմից։ Հանդիպումից հետո լրագրողներին ասաց ԿԽՄԿ-ի պատվիրակության հաղորդակցման ծրագրերի ղեկավար Զառա Ամատունին։

«Նախաձեռնող խմբին բացատրեցինք, որ կան որոշակի պահանջներ, որոնք մեր կազմակերպությունը, իր գործելաոճից ելնելով, չի կարող բավարարել, բայց մեր աշխատանքը տևական է և համաձայն մեր գործելաոճի` մենք փորձում ենք կողմերի հետ գտնել հնարավոր լուծումներ, որոնք կապահովեն մեր աշխատանքի հետագա ընթացքը, որն այսօրվա դրությամբ կասեցված է»,- ասաց նա։

Զ. Ամատունին հայտնեց, որ ԿԽՄԿ-ի անդամները տեսակցել են Բաքվում գտնվող Վագիֆ Խաչատրյանին, պատվիրակների մեջ եղել է նաև բժիշկ, հնարավորություն է  տրվել կապ հաստատել ընտանիքի հետ։

«Առաջին հերթին մենք տեղեկացնում են ընտանիքի անդամներին, ավելի քիչ տեղեկություններով կսիվում ենք հանրության հետ»,- ասաց Զ. Ամատունին։

Հիշեցնենք, որ Երևանում սովորող արցախցի տասնյակ ուսանողներ վաղ առավոտից փակել էին ԿԽՄԿ հայաստանյան գրասենյակի մուտքը և պահանջում են հանդիպում կառույցի ղեկավարության հետ:

«Մեր պահանջն է Կարմիր խաչի միջազգային կազմակերպության ղեկավարի հետ հանդիպում, Ժնևում հրավիրեն մամուլի ասուլիս, բոլորին տեղյակ պահեն, որ իրենց անմիջական վերահսկողության տակից մարդ են գողացել, այլապես կստացվի համաձայն եք այն ամենի հետ, ինչ տեղի է ունեցել շաբաթ օրը»,- ասել էր ակցիայի մասնակիցը։

Հիշեցնենք, որ հուլիսի 29-ին Ադրբեջանի սահմանապահ ծառայության ներկայացուցիչները Բերձորի միջանցքում ապօրինի տեղակայված ադրբեջանական «անցակետից» առևանգել են վիրահատության նպատակով Կարմիր Խաչի միջազգային կոմիտեի միջոցով Արցախից Հայաստան տեղափոխվող 68-ամյա Վագիֆ Խաչատրյանին։ Ադրբեջանում նրան մեղադրանք է առաջադրվել։