Ձեր վստահելի աղբյուրը

«Բավարաված չեմ հանդիպումից, իմ կարծիքն այն է, որ իրենք ամեն ինչին ասում էին՝  սա մեր հնարավորության սահմանում չէ»,- Կարմիր խաչի միջազգային կոմիտեի հայաստանյան գրասենյակի ղեկավար Թիերի Ռիբոյի հետ հանդիպումից հետո ասաց կազմակերպության մոտ ակցիա անող երիտասարդներից մեկը։

Նա նշեց, որ ասում էին՝ եթե հանրային որևէ բան հնչեցնեն, ավելի կվնասեն իրավիճակին։

«Բայց այս դեպքում մենք այլևս կորցնելու բան չունենք։  Մեր հայրենակիցներն այնտեղ սովի են մատվում, տեղաշարժի տարրական պայմաններից զուրկ են, մենք այստեղ մեր ընտանիքներից կտրված ենք։ Ի՞նչ հայտարարություն պետք է անեն, որ վնասի մեզ։ Ինչքան հնարավոր է, մեզ վնասել են»,- ասաց երիտասարդը։

Նա նշեց, որ իրենք չեն դադարեցելու ճնշումները մինչև առարկայական արդյունքի չհասնեն։

«Այսպես այլևս հնարավոր չէ։ Այսօր Վագիֆ Խաչատրյանն է, վաղը կարող են լինել մեր տատիկներն ու պապիկները»,- ասաց արցախցի երիտասարդը։

Հիշեցնենք, որ Երևանում սովորող արցախցի տասնյակ ուսանողներ վաղ առավոտից փակել էին ԿԽՄԿ հայաստանյան գրասենյակի մուտքը և պահանջում են հանդիպում կառույցի ղեկավարության հետ: Նրանց պահանջ էր՝ ադրբեջանցիների կողմից առևանգված Արցախի 68-ամյա բնակիչ Վագիֆ Խաչատրյանին, Ժնևի գրասենյակում ասուլիս հրավիրել և գործողությանը հստակ գնահատական տալ։

Հուլիսի 29-ին Ադրբեջանի սահմանապահ ծառայության ներկայացուցիչները Բերձորի միջանցքում ապօրինի տեղակայված ադրբեջանական «անցակետից» առևանգել են վիրահատության նպատակով Կարմիր Խաչի միջազգային կոմիտեի միջոցով Արցախից Հայաստան տեղափոխվող 68-ամյա Վագիֆ Խաչատրյանին։ Ադրբեջանում նրան մեղադրանք է առաջադրվել։