Ձեր վստահելի աղբյուրը

«Այն մարդիկ, որ տեղեկացված են խնդրի մասին, քաջ հասկանում եմ, որ այստեղ իրավական որևէ գործընթաց չկա»,-լրագրողների հետ ընթացող հանդիպմանը հայտարարեց գեներալ-մայոր Գրիգորի Խաչատուրովի փաստաբան Միհրան Պողոսյանը։

Նա հիշեցրեց, դեռ մարտին, երբ կալանավորվեց Գ. Խաչատուրովը, նրա հանրային պաշտպանության նախաձեռնության և պաշտպանական խմբի ներկայացուցիչները կանխատեսել էին, իշխանությունները նրան կպահեն անազատության մեջ այնքան, մինչև իրենց մտքում եղածն իրականացնեն։

«Սա գործ անվանել հնարավոր չէ։ Հիշեցնեմ,  ըստ դատախազության, պաշտպանության նախարարությունն անօրինական կարգով գույք է վաճառել, այն գնել է Խաչատուրովի ընկերը։ Հիմա մեղադրում են Խաչատուրովին փողերի լվացման համար։ Սա աբսուրդի ժանրից էլ չէ, հետագայում երևի գրքեր կգրվեն այս պատմության սյուրռեալիզմի հետ կապված»,-ասաց Մ. Պողոսյանը՝ հիշեցնելով, որ ՊՆ-ն հարյուրավոր մարդկանց շենք, շինություններ է վաճառել, հարուցված վարույթներից որևէ մեկով որևէ անձ կալանավորված չէ։

Այս ամենը հաշվի առնելով էլ փաստաբանը հայտարարեց՝ Գ. Խաչատուրովի նկատմամբ իրականացվող հետապնդումը անձնական վերաբերմունքի հետևանք է։

«Գիտեք, որ Գ. Խաչատուրովի կալանքի ժամկետն անօրինական կերպով երկարացվել էր մինչև օգոստոսի 15-ը, թույլ էին տվել բազմաթիվ խախտումներ կալանքի ժամկետը երկարացնելու որոշումն ընդունելիս, մենք վերաքննիչ բողոք էինք ներկայացրել ու այդ խախտումները հատ առ հատ արձանագրել է քրեական վերաքննիչ դատարանը։ Ուղղակի Գրիգորի Խաչատուրովին կալանքի տակ պահելու իշխանության ցանկությունն ու մոլուցքն այնքան մեծ են, որ նույնիսկ այդ խախտումներն արձանգարելու դեպքում վերաքննիչ դատարանին, իմ գնահատմամբ, թույլ չեն տվել օբյեկտիվ որոշում կայացնել, հարցի լուծումը երկարաձգել են։ Վերաքննիչ դատարանը որոշում չի կայացրել, և որոշել է խախտումների սահմանադրականության մասով դիմել  ՍԴ»,-ասաց փաստաբանը։

Մանրամասները՝ տեսանյութում։