Ձեր վստահելի աղբյուրը

«Ես պատրաստ եմ թույլատրելի թափանցիկության և դասակարգված տեղեկատվության տրամադրման առումով ձեր հարցադրումներին պատասխանել, հաշվետվություն ներկայացնել իմ գործունեության վերաբերյալ»,- 44- օրյա պատերազմի հանգամանքներն ուսումնասիրող ԱԺ քննիչ հանձնաժողովում ասաց պաշտպանության նախկին նախարար Դավիթ Տոնոյանը։

Նրա խոսքով՝ կլինի նաև նիստը փակ ձևաչափով անցկացնելու անհրաժեշտություն, քանի որ ցանկանում է հանձնաժողովի աշխատանքների ճիշտ վերլուծության համար որոշակի տեղեկատվություն տրամադրել։
Նա պարզաբանեց, թե ինչու է որոշել հիմա մասնակցել նիստին։

«Նիստին մասնակցում եմ, քանի որ իմ մոտ հարցեր առաջացրեց Նիկոլ Փաշինյանի բաց ելույթը քննիչ հանձնաժողովում, ինչպես նաև գլխավոր շտաբի նախկին պետ Օնիկ Գասպարյանի հրապարակային պատասխանը»,- ասաց նա։ 

Նշենք, որ հանձնաժողովի նիստին չէին մասնակցում ԱԺ ընդդիմադիր խմբակցությունները։ Մինչ հարցերին անցնելը, Դավիթ Տոնոյանը ևս մեկ անգամ դիմեց ընդդիմությանը` մասնակցել գոնե փակ նիստին։

«Խնդրում եմ, որ գոնե փակ նիստի ժամանակ ընդդիմության մասնակցությունը լինի, առնվազն երկու ուժի մասնակցությունը՝ ՀՅԴ-ի ևՀՀԿ-ի: Հակառակ դեպքում ես կխնդրեի այդ կուսակցությունների ներկայացուցիչներին այլևս հրապարկային չարտահայտվել առնվազն իմ գործունեության հետ կապված հարցերին»,- նշեց Դավիթ Տոնոյանը:

Նշենք, որ դատարանը բավարարել է պաշտպանության նախկին նախարար Դավիթ Տոնոյանի միջնորդությունը` օգոստոսի 1-ին և 2-ին մասնակցել հանձնաժողովի նիստերին։