Ձեր վստահելի աղբյուրը

«Ժողովուրդ» թերթը գրում է.

«Նոր իշխանությունները դեռ 2018 թվականին փաստում էին, որ վերջ է տրվելու «ԽԾԲ»-ով՝ «խնամի-ծանոթ-բարեկամ» տարբերակով պաշտոնի նշանակումներին։ 2018 թվականից, սակայն, Վիճակագրական կոմիտեի նախագահի տեղակալ նշանակվել է Գագիկ Գևորգյանը, որն աշխատանքի վարձատրություն է ստացել ՀՀ վիճակագրական կոմիտեից 10 մլն 055 հազար դրամի չափով։

Իսկ նրա եղբայրը Արմեն Գևորգյանը դարձել է Հաշվեքննիչ պալատի անդամ, որը Հաշվեքննիչ պալատից ստացել է 11 մլն 356 հազար դրամ։ Արմեն Գևորգյանի ընտանիքի անդամները ևս աշխատանքի են անցել ՀՀ վիճակագրական կոմիտեում. նրա դուստը՝ Աննա Գևորգյանը, ըստ հոր հայտարարագրի, աշխատում է ՀՀ վիճակագրական կոմիտեում՝ որպես «ՎՏՀ» ծրագրի ԱԸՀ որակի վերահսկող, սակայն, ըստ իր հայտարարագրի, նրա աշխատավայրը Հաշվեքննիչ պալատն է։

Գևորգյանի հետ համատեղ բնակվող Անահիտ Օհանյանը աշխատում է իբրև «Ազգային վիճակագրական համակարգի ամրապնդման համար ազգային ռազմավարական ծրագրի իրականացում» ծրագրի գնումների մասնագետ և ստացել է 3 մլն 678 հազար դրամ՝ որպես քաղաքացիաիրավական այլ պայմանագրերից ստացված եկամուտ։

Հենց այսպես էլ աստիճանաբար պետական կառավարման համակարգում սերտաճում են ընտանիքների անդամները, խարխլվում է զսպումների և հակակշիռների համակարգը: Ստեղծվում են մենաշնորհներ, որոնք կապված են իրար հետ, և ղեկավարվում են մեկ գլխավոր կենտրոնից»։

Մանրամասները թերթի այսօրվա համարում