Տպավորություն է՝ Ադրբեջանը ցանկանում է հետագայում ՀՀ–ի նկատմամբ տարածքային պահանջներ ներկայացնել. Փաշինյան
Հումանիտար ճգնաժամի պայմաններում Ղարաբաղի ժողովրդին աջակցության համար ԼՂ ուղարկված 361տոննա հումանիտար օգնությունը շարունակում է գտնվել ՀՀ Սյունիքի մարզի Կոռնիձոր բնակավայրի հատվածում՝ Լաչինի միջանցքի մուտքի մոտ, քանի որ Ադրբեջանը, կոպտորեն խախտելով 2020 թվականի նոյեմբերի 9-ի եռակողմ հայտարարության 6-րդ կետը, ապօրինաբար արգելափակում է հումանիտար բեռների մուտքը ԼՂ: Գործադիրի այսօրվա նիստում ասաց Նիկոլ Փաշինյանը:
Նա հիշեցրեց, որ ՀՀ Կառավարությունը ԼՂ մարդասիրական բեռներ ուղարկելու որոշում կայացրեց այն բանից հետո, երբ Կարմիր խաչի միջազգային կոմիտեն հայտարարեց իր կողմից ԼՂ հումանիտար բեռներ տեղափոխելու անհնարինության մասին, քանի որ Ադրբեջանն ապօրինաբար խոչընդոտում է նաև այդ ջանքերին:
«Ադրբեջանը համառորեն շարունակում է պնդել, թե Լաչինի միջանցքի փակման պատճառներից մեկը հունիսի 15-ին, ինչպես ինքն է ձևակերպում, «հայկական կողմի ռազմական սադրանքն է»: Հիշեցնեմ՝ այդ օրը Ադրբեջանը փորձել էր դրոշ տեղադրել Հակարիի կամրջի եզրին՝ Հայաստանի տարածքում՝ արժանանալով Հայաստանի սահմանապահ զորքերի օրինական հակազդեցությանը։ Հենց Ադրբեջանի՝ վերը նշված գործողությունն է սադրանքը, առավել ևս այն պայմաններում, երբ երկու երկրների միջև սահմանազատման և սահմանագծման աշխատանքները դեռ մեկնարկի փուլում են», - նշեց Նիկոլ Փաշինյանը։
Նրա խոսքով՝ տարբեր տեղերում դրոշներ դնելու Ադրբեջանի գործելակերպը սահմանազատման և ընդհանրապես խաղաղ գործընթացը վիժեցնելու է նման։
«Դա է վկայում նախորդ օրը Ադրբեջանի նախագահի «Եվրոնյուզ»-ին տված հարցազրույցը՝ հայտարարելով, թե իբր Ադրբեջանը Հայաստանից տարածքային պահանջներ չունի, ապա ասում, որ Հայաստանի ու Ադրբեջանի միջև սահմանները որոշված չեն: Հայաստանի և Ադրբեջանի միջև սահմանները որոշվել են 1991 թ-ի Ալմաթիի հռչակագրով և դա վերահաստատվել է 2022-ի հոկտեմբերի 6-ի Պրահայի քառակողմ հանդիպման արդյունքներով, որտեղ Ալմաթիի հռչակագիրն ընդունվել է որպես երկու երկրների միջև սահմանազատման և սահմանագծման հիմք:
Տպավորություն է ստեղծվում, թե Ադրբեջանի պլանը հետևյալն է. Հայաստանի և Ադրբեջանի միջև Ալմաթիի հռչակագրով ֆիքսված սահմանը վիճարկելու տեղ թողնող դրույթներով խաղաղության պայմանագիր ստորագրել, և հետագայում արդեն սահմանազատման և սահմանագծման գործընթացում տարածքային պահանջներ առաջադրել Հայաստանի Հանրապետությանը»,- հայտարարեց Նիկոլ Փաշինյանը։
Նա նաև նշեց՝ եթե Հայաստանի ու Ադրբեջանի միջև սահմանները որոշված չեն, ապա ի՞նչ տարածքների հարց է բարձրացնում Ադրբեջանը սահմանի տարբեր հատվածներում․ «Եթե նման հարց բարձրացվում է, ուրեմն սահմանները որոշված են, իսկ այդ սահմանի գծից զորքերի հայելային հետքաշման Հայաստանի առաջարկը շարունակում է մնալ ուժի մեջ»։
Ըստ նրա` Հայաստանը հավատարիմ է միմյանց տարածքային ամբողջականության ճանաչման հիման վրա Ադրբեջանի ու Հայաստանի միջև խաղաղություն հաստատելու պայմանավորվածությանը, և սպասում է Ադրբեջանի կողմից այդ պայմանավորվածության հրապարակային վերահաստատմանը։
«Ի հեճուկս բոլոր բարդությունների՝ մենք իսկապես երկարաժամետ, կայուն և տևական խաղաղության հասնելու հնարավորություն ունենք։ Եվ Ադրբեջանին կոչ եմ անում զերծ մնալ այդ հնարավորությունը նվազեցնելուն ուղղված քայլերից, ինչպես օրինակ՝ միջազգային մեխանիզմի շրջանակներում Ստեփանակերտ-Բաքու երկխոսության շարունակական տորպեդահարումը, Լաչինի միջանցքի ապօրինի արգելափակումը և շաբաթվա սկզբին Լաչինի միջանցքից ԿԽՄԿ-ի կողմից Երևան տեղափոխվող Լեռնային Ղարաբաղի բնակիչ Վագիֆ Խաչատրյանի առևանգումը։
Վագիֆ Խաչատրյաին, մյուս գերիներին, պատանդներին, պահվող անձանց ազատ արձակելը խաղաղության օրակարգին հավատարմության տպավորիչ ազդարարում կլիներ»,- նշեց Նիկոլ Փաշինյանը։
Նա մեկ անգամ ևս Ադրբեջանին կոչ արեց չարգելափակել Հայաստանից ուղարկված հումանիտար բեռների մուտքը Լեռնային Ղարաբաղ Լաչինի միջանցքով։ Լաչինի միջանցքով, առավել ևս, որ բեռի անցմանը խոչընդոտելը 2020թ. նոյեմբերի 9-ի եռակողմ հայտարարության և Արդարադատության միջազգային դատարանի փետրվարի 22-ի և հուլիսի 1-ի որոշումների կոպիտ խախտում է:
«Չնայած մյուս կողմից՝ Ադրբեջանի նախագահի Եվրոնյուզին տված հարցազրույցում արած հայտարարությունից հետո՝ թե Լաչինի միջանցքն արգելափակված չէ, անհրաժեշտ է լսել Լեռնային Ղարաբաղում Ռուսաստանի Դաշնության խաղաղապահ զորախմբի պարզաբանումը՝ ինչո՞ւ նրանք չեն ապահովում ՀՀ կառավարության հումանիտար օգնության մուտքը Լեռնային Ղարաբաղ, եթե Ադրբեջանը պնդում է, թե չի արգելափակել Լաչինի միջանցքը: Կարծում եմ՝ այս հարցի պարզաբանումը կարևոր է, և մեր համապատասխան մարմինները պետք է աշխատեն այս հարցի շուրջ պարզաբանումներ ստանալու ուղղությամբ»,- ասաց նա։
Լրահոս
Տեսանյութեր
Նարեկ Մալյանն ազատության մեջ է
