Ձեր վստահելի աղբյուրը

Սոցցանցերում օրեր շարունակ քննարկվեց ու քննադատվեց պատերազմի հետևանքները չհաղթահարած երկրի բյուջեից մի քանի մլն դոլար գումար հատկեցնել ու ռեփփեր Սնուփ Դոգին Հայաստան բերելու որոշումը։

Այսօր Panorama.am-ը հարցում է իրականացրել քաղաքացիների շրջանում՝ պարզելու, թե ինչ կարծիք ունեն այս հարցի շուրջ նրանք։

«Ես չգիտեմ՝ ինչքան գումար ա տրամադրվում, եթե խոսքը էն գումարի մասին է, որ ասում են, ուրեմն պետք չի, իսկ եթե նորմալ ա, ուրեմն ոչինչ»,-ասաց քաղաքացիներից մեկը։

Հարցվողների մեծ մասի կարծիքով, գումարն ավելի խելամիտ կերպով կարելի էր ծախսել։

«Լիքը այլ ոլորտներ կան մեզ մոտ զարգացնելու՝ մանավանդ պատերազմից հետո։ Խոսքը մեր երկրի անվտանգության մասին է, ես այդ առումով կնայեի, ինչ-որ օժանդակ ուղղություններ կընտրեի, որ դրանք բարելավվեին»։

«Ինձ թվում է, որ պետք չի, քանի որ հազար  հարց ունի Հայաստանը, որ կարա դրանք լուծի»։

«Չի կարելի։ Սնուփին բերելու փոխարեն, կարելի էր էդ գումարն ուղղել բանակին, զենքին, Արցախին»։


Մեկ այլ քաղաքացու կարծիքով էլ նպատակահարմար է, քանի որ երաժշտությունը միշտ էլ հաճելի է՝ մանավանդ երիտասարդության համար։

Հարցման մասնակիցներից մեկն էլ զարմացավ հարցից. «Բերեն՝ ի՞նչ անեն։ Չէ, բերելու բան չի, առանց էդ էլ երիտասարդությունը սխալ ուղով ա գնում, ավելի լավ կլինի չբերեն։ Լավ արտիստներ ունենք, թող իրենց բերեն։ Ես էլ թոռներ ունեմ ու չեմ ցանականա, որ նրանք նույնիսկ գաղափար ունենան»։

«Ինձ թվում է չարժի, մեր ժողովուրդը հիմա էն վիճակում չի, որ նման ծախսեր անի և նման չակերտավոր «աստղեր» բերի, ավելի լավ է զինվորականների վրա ծախսեն»,-նշեց մեկ ուրիշը։

Հարցման մեկ այլ մասնակից, ողջունելով համերգի գաղափարը, պնդեց, որ Հայաստանը վատ վիճակում չէ, իսկ Արցախը պետք է դիմանա.

«Ես այդպես չեմ կարծում, որ ծանր իրավիճակում ենք, գտնում եմ նպատակահարմար, պետք է դիմանալ»։