Իսկ վանաձորցի երեխաներին չընդունողը Ջրաշխարհը չէր, Ակվատեկն էր
Երկար, բայց անպայման կարդալու. - գրում է Արման Հայրապետյանը երեկվա՝ «Ջրաշխարհի դեպքի» մասին, որ բազմաթիվ գրառումների ու դժգոհությունների ու հիասթափությունների առիթ դարձավ;
Մինչ գրառումը կարդաք՝ հիշեցնենք, Հասմիկ Սողոմոնյանը պատմում էր, որ Վանաձորից Երևան են բերել հատուկ կարիք ունեցող երեխաների ու ընկերությունը չի ընդունել։
«Ջրաշխարհի» հասցեին ամեն ինչ ասելուց հետո, տիկին Սողոմոնյանը ճշտում է՝
«10 տարի առաջ որոշեցինք սահմանապահ գյուղերից մեկի 7-13 տարեկան երեխաների համար կազմակերպել երկօրյա այց Երևան։ Նրանցից շատերը մայրաքաղաքում չէին եղել։ Որոշել էինք այդ երկու օրվա ընթացքում որքան հնարավոր է շատ տեղեր տանել։
Իրականացման հետ կապված գրեթե ամեն ինչ պատրաստ էր, բայց չէինք կարողանում տրանսպորտ գտնել։ Սկզբում զանգում էի ընկերությունների և ասում, որ մեծ ավտոբուս է պետք ու նշում, որ սահմանապահ գյուղից երեխաների տեղափոխելու համար է, այն հույսով, որ ոչ միայն չեն մերժի, այլ նաև ավելի լավ պայմաններ կասեն։ Մինչև ընկերներիցս մեկը, որ տուրիստական ոլորտում էր, բայց ցավոք ավտոբուս չունեին, հուշեց, որ մերժումներ ստանալու իրական պատճառը ոչ թե ավտոբուսների զբաղվածությունն էր, այլ երեխաներին նշելը։ Շատերը մտածում էին, որ ավելի լավ է ավելի թանկով օրինակ արտասահմանցի տարեց զբոսաշրջիկների տանեն Ծաղկաձոր, որ ճանապարհի կես քնած կլինեն, քան աշխույժ երեխաների, այն էլ վատ ճանապարհներով գյուղից ու բարեգործական ծրագրի շրջանակներում, երբ շատ թանկ գին չեն կարող ասել։
Վերջը մի կերպ գտանք ավտոբուս, սակայն պայմանով, որ գյուղից մինչև ճանապարհի որոշակի հատված այլ ավտոբուսներով կբերեն ու հետո հետ կտանեն։
Մյուս փոքր խնդիրը սննդի հետ էր կապված։ Մի քանի տեղ ունեինք, որոնք անվճար հյուրընկալելու և սնունդ էին ապահովելու, բայց Երևան հասնելուց հետո մի տեղ պետք է տանեինք ճաշելու, իսկ դրա համար բյուջեն չբավարարեց, քանի որ ավտոբուսին նախատեսվածից շատ վճարեցինք։ Խոսքը 54 երեխայի, 12 ուղեկցողի և 7 կամավորների, այսինքն 73 հոգու մեկանգմյա սնունդ ապահովելու մասին է խոսքը։ 4 պիցցերիա զանգեցի, ոչ մեկն անվճար չընդունեց ու այնպիսի զեղչ էին առաջարկում, որն ասեն իրենց էջում ակցիայի տակ դրված էր։ Սիրիահայերին, որ նոր շաուրմայանոց էին բացել, խոսքի մեջ ասեցի ու կես գնով ապահովեցին։
Հիմա անցնեմ ամենակարևոր մասին`
Այդ ամբողջ ծրագիրը սկիզբ էր առել երեխաներին Ջրաշխարհ բերելու մտքից, որին Ջրաշխարհի ղեկավարությունը ոչ միայն դրական էր արձագանքել, այլ նաև պատրաստակամություն հայտնել երեխաներին ընդունել անվճար։
Անձնակազմն էլ շատ ուշադիր էր մեր այցի ժամանակ և անընդհատ մեզ հետ կապի մեջ էին։
Երեկ, երբ Ջրաշխարհի մասին գրառումը սկսեց տարածվել, ուզում էի այս մասին գրել, մանավանդ երբ Ջրաշխարհի արձագանքը տեսա, ինչն իրականությանն ավելի մոտ էր, քան դրանից առաջ հայտնված գրառումը։ Ես դեռ չեմ խոսում այն մասին, թե որքանով կոմպիտենտ էին նկարում երևացող այդ մի երիտասարդն ու երկու պատանին երեխաների խմբին նման տեղ տանելու առումով։ Մենք 54 երեխայի հետ 12 ծնող ունեինք ու 7 կամավոր, բայց 5 կազմակերպիչներով մշտապես իրենց կողքին էինք։ Չեմ խոսում այն խնդիրների մասին, որ կարող էին տեղում առաջանալ ու որ նման այցերը պետք է նախօրոք պլանավորել, համաձայնեցնել, որ ժամանց կենտրոնն էլ պատրաստ լինի ու գուցե օրինակ ավելի քիչ այցելուներ ընդունի կամ հավելյալ աշխատակիցներ ունենա։ Հիմա միայն կանդրադառնամ բոյկոտին և վիրավորանքներին։ Հուսով եմ, որ այն մարդիկ, ովքեր առանց վարանելու ինչ ասես գրեցին Ջրաշխարհի, դրա անձնակազմի ու ղեկավարության հասցեին, որոնք չնայած Ջրաշխարհ չէին գնում և չէին գնալու(ինչպես օրինակ ես վերը նշված այցից առաջ և հետո) ու հայտարարում էին, որ էլ չեն գնալու, հիմա կրկին առանց վարանելու հակառակ գրառումը կանեն ու գոնե ներողություն կխնդրեն անհիմն վիրավորանքների և բարի համբավը ոտնատակ անելու համար»։
Հարակից հրապարակումներ`
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
