Ձեր վստահելի աղբյուրը

«Առանձնապես ասելիք չունեմ»,-այսօր դատարանում հայտարարեց ՀՀ երրորդ նախագահ Սերժ Սարգսյանը, որը ցուցմունք էր տալիս դիզելի հայտնի գործով։
 

Նա նշեց՝ ինչպես ցույց տվեց դատաքննությունը,  Սերգո Կարապետյանը ճիշտ որոշում է կայացրել, եթե նման որոշում չկայացներ, ապա պատասխանատվություն կկրեր այն ժամանակ։

«Շատ պարզ բան է տեղի ունեցել։ Այդ ծրագիրը կարող էին իրականացնել, ինչպես պարզվեց նաև դատաքննության ընթացքում, երկու ընկերություն։ Նա այդ ընկերություններից ընտրել է նրան, որը ցածր գին է առաջարկել։ Ես, անկեղծ ասած ուրախ չեմ պաշտպանելու այն մարդուն, որ զրպարտել է ինձ, բայց իրականությունը դա է»,-ասաց ՀՀ երրորդ նախագահը։

«Ինչ հարաբերություններ ունե՞ք Բարսեղ Բեգկարյանի հետ»։ Սերժ Սարգսյանը մեղադրողի՝ իրեն ուղղված այս հարցը որակեց հռետորական, ասաց՝ քննության ընթացքւոմ հայտարարել է, որ Բեգլարյանին ճանաչում է 1971 թվականից ու այդ թվականից սկսած ունի ընկերական հարաբերություններ։

Մեղադրական եզրակացության համառոտ բովանդակության համաձայն, Սերժ Սարգսյանին մեղադրանք է առաջադրվել այն բանի համար, որ նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում։

Սերժ Սարգսյանի օրոք գյուղատնտեսության նախարար Սերգո Կարապետյանին մեղադրանք է առաջադրվել այն բանի համար, որ նա 2010թ․ դեկտեմբերի 31-ից մինչև 2016թ․ սեպտեմբերի 20-ն ընկած ժամանակահատվածում հանդիսանալով ՀՀ գյուղատնտեսության նախարար, այսինքն՝ ՀՀ կառավարության անդամ, պաշտոնատար անձ, «ֆլեշ» ՍՊ ընկերության սեփականատեր Բարսեղ Բեգլարյանի դրդմամբ, 2013թ․ ՀՀ գործող նախագահ Սերժ Սարգսյանի կազմակերպմամբ,իր տեղակալ Սամվել Գալստյանի և ՀՀ գյուղատնտեսության նախարարության բուսաբուծության վարչության պետ Գևորգ Հարությունյանի օժանդակությամբ անձնական այլ շահագրգռվածությունից ելնելով, իր պաշտոնեական դիրքը ծառայության շահերին հակառակ, օգտագործելով պաշտոնատար այլ անձանց հետ դիտավորությամբ խմբի կազմում կատարել է ՀՀ կառավարության պահուստային ֆոնդում գտնվող առանձնապես խոշոր չափերով պետական միջոցների՝ ընդհանուր 489,160,310 ՀՀ դրամի վատնում։

Գործով ամբաստանյալներ են նաև «Ֆլեշ» ընկերության սեփականատեր Բարսեղ Բեգլարյանն ու գյուղատնտեսության նախարարության նախկին պաշտոնյաներ Սամվել Գալստյանն ու Գևորգ Հարությունյանը։

Նշենք, որ քննության ընթացքում կորոնավիրուսի հետևանքով մահացել են Սերգո Կարապետյանն ու Սամվել Գալստյանը։

Այս տարվա մայիսի 11-ին դատական նիստում ամբաստանյալներից Գևորգ Հարությունյանը հայտարարել էր. «Սերգո Կարապետյանը զանգեց, ասաց՝ երկար չեմ կարող խոսել, ես նմանատիպ ցուցմունք եմ տվել, որ նախագահն է ասել, պայմանավորվածություն կա, որ պետք է գործը կարճվի, գումար վերականգնվի ու դու էլ ասա, որ սուտ դուրս չգամ, որ գործը չերկարի»։