Ձեր վստահելի աղբյուրը

Ակնհայտ է, որ Արմենին որևէ մեկը լռեցնել չի կարող, նա իր ասելիքն ասել է ու ասելու է։ Այս մասին  Հակակոռուպցիոն դատարանի դիմաց կազմակերպված ակցիայում հայտարարեց ԱԺ «Պատիվ ունեմ»  խմբակցության քարտուղար Տիգրան Աբրահամյանը։

Հիշեցնենք, որ այսօր Հակակոռուպցիոն դատարանում՝ դատավոր Գիվի Հովհաննիսյանի նախագահությամբ մեկնարկել է ՀՀԿ փոխնախագահ Արմեն Աշոտյանի նկատմամբ ընտրված խափանման միջոցի ժամկետը երկարացնելու միջնորդության քննությունը։

«Իշխանությունները փորձում են ամեն գնով՝ ճնշումների, սպառնալիքների միջոցով փակել Արմենի բերանը։ Իրականում այս երկու ամսվա մեջ ինչ Արմենը  նստած է, նրա մասին ավելի շատ են խոսում, քրեակատարողական հիմնարկից նա ավելի շատ է գրում, իր կարծիքն ավելի շատ է արտահայտում, երիտասարդներն էլ ամենօրյա ռեժիմով փողոցներում Արմեն Աշոտյանի կալանավայրում գտնվելու վերաբերյալ իրազեկման ակցիաներ են իրականացնում։ Էլ չեմ խոսում միջազգային մեր այն գործընկերների մասին, որոնք աշխարհի ամենատարբեր հատվածներից արձագանքում են այս իրավիճակին»,- ասաց Տիգրան Աբրահամյանը։

Նրա խոսքով՝ Աշոտյանի ձայնն այսօր շատ ավելի լսելի է, նրա ելույթները շատ ավելի մարդ է լսում, քան եղել է նրա անազատության մեջ գտնվելը։

«Արմենի նման մարդիկ մեր քաղաքական դաշտի ռազմիկներն են։ Նրանց նմաններին որևէ ձևով՝ սպառնալիքներով, ճնշումներով, կանգնացնել այլև չի լինելու։ Դա ունի շատ պարզ պատճառ․ Արմենը պայքարում է իր հողի ու ջրի համար, իր, իր ընկերների, հայ ժողովրդի համար; Նրա գործը շինծու,կարված, ակնհայտ ընդգծված քաղաքական բաղադրիչներով որևէ ապագա  չի կարող ունենալ»,- ասաց պատգամավորը։ 

Տիգրան Աբրահամյանը նշեց, որ որքան էլ այս իշխանությունը ջանքեր է գործադրում՝ Արմեն Աշոտյանի խոսքը որևէ ձևով հանրությանը չհասնի, բնականաբար, նրա մոտ չի ստացվելու։ 

«Ի դեպ, նույնը տեղի է ունենում Արցախի հարցով։ Իշխանությունը փորձում է տարբեր միջոցառումների՝ քեֆի, փառատոնների և նմանատաիպ այլ իրադարձություններ միջոցով երկրորդ պլան տանել մեր երկրի համար կարևորագույն հարցերը, ինչը որևէ պարագայում  նրա մոտ չի ստացվելու։ Մեր ժողովուրդը ցույց է տվել, որ պետության համար ամենակարևոր պահերին լինում է այնտեղ, որտեղ պետք է լինի»,- ասաց Տիգրան Աբրահամյանը։