Ձեր վստահելի աղբյուրը

Շիրակի մարզում տեղի ունեցած ողբերգական ավտովթարից մահացածներից մեկը Լիանա Քոչինյանն էր, Երևան քաղաքից «Հեքիաթ» մանկապարտեզի մանկավարժ: Այս մասին 24News-ի հետ զրույցում ասել է Լիանայի քրոջ դուստրը:

«41տարեկան էր, ամուսնացած չէր գնացել էր իր պապերի հողը տեսներ` Աղթամարում ուխտի էր: Միշտ հավատքով, աստվածային մարդ էր, հետը  աստվածաշունչ Նարեկ էր տարել»,- պատմել է Լյուսի Հակոբյանը:

Հիշեցնենք, որ օգոստոսի 14-ին՝ ժամը 00։20-ի սահմաններում, Երևան-Գյումրի ավտոճանապարհի 90-րդ կիլոմետր հատվածում միմյանց են բախվել «Զիլ» և «Վոլկսվագեն» մակնիշի տրանսպորտային միջոցները, որի հետևանքով վերջինիս վարորդը և 10 ուղևոր մահացել են, իսկ «Զիլ» մակնիշի ավտոմեքենայի վարորդը և «Վոլկսվագեն» մակնիշի ավտոմեքենայի 5 ուղևոր, մարմնական վնասվածքներով, տեղափոխվել են բժշկական կենտրոն։

Դեպքի առթիվ ՀՀ քրեական օրենսգրքի 342-րդ հոդվածի 3-րդ մասով նախաձեռնվել է քրեական վարույթ:

Ողբերգական ավտովթարի հետևանքով «Volkswagen» մակնիշի միկրոավտոբուսի մահացած ուղևորներն են Մ․Է․-ն (ծնված 2002 թ․), Լ․Ք․-ն (ծնված 1982 թ.), Ե․Փ․-ն (ծնված 2005 թ.), Ն․Ա․-ն (ծնված 1996 թ.), Հ․Դ․-ն (ծնված 2002 թ.), Ա․Մ․-ն (ծնված 1999 թ.), Բ․Թ․-ն (ծնված 1973 թ.), Ա․Հ․-ն (ծնված 1978 թ.), Ա․Մ․-ն (ծնված 1972 թ.) և Ա․Մ․-ն (ծնված 1967 թ.):

Մահացածների թվում է նաև «Volkswagen» մակնիշի միկրոավտոբուսի 35-ամյա վարորդ Մ.Մ.-ն։