Ձեր վստահելի աղբյուրը

Այսօր կայանալու է Ադրբեջանի կողմից լիակատար շրջափակման հետևանքով Լեռնային Ղարաբաղում հումանիտար իրավիճակի վատթարացման առնչությամբ ՀՀ պահանջով հրավիրված ՄԱԿ Անվտանգության խորհրդի հրատապ նիստը։ Դրան ընդառաջ ՄԱԿ-ի  հայաստանյան գրասենյակի դիմաց բողոքի ակցիա իրականացրեցին Երևանում բնակվող արցախցիները՝ պահանջելով ՄԱԿ ԱԽ-ից առավելագույն արդյունք ապահովել, որպեսզի Ադրբեջանը կասցենի իր ցեղասպան քաղաքաանությունն Արցախում։

«Արցախում 120 հազար մարդուց արդեն ունենք 119,999 մարդ, և այս թվերը զուտ թվեր չեն, նրանք մեր հարազատներն են, մեր ընտանիքները, Արցախի հայ ժողովուրդը»,-  ասաց ակցիայի մասնակիցը։

Նրանք նշում են՝ հայ ազգի հերթական ցեղասպանությունն է  տեղի ունենում։

«1915 թվականին նույնն է տեղի ունեցել ու ամբողջ աշխարհը լռել է։ Հարյուրից ավելի տարի հետո գուցե  իրենց քաղաքական շահերից, քաղաքական առևտրից ելնելով սկսել են ճանաչել Հայոց ցեղասպանությունը, բայց դա որևէ մեկի կյանքը չի փրկել։ Հենց այս պահին ևս մեկ ցեղասպանություն տեղի է ունենում Արցախում»,- ասաց ակցիայի մեկ այլ մասնակից։

Քաղաքացիները գրասենյակի բակ նետեցին Արցախում սովամահ եղած տղամարդու նկարները․ «Քանի՞ զոհ է պետք, որ բավարար լինի: Արցախում 120 հազար հայ ամեն օր ու վայրկյան ապրում է այս իրականությունը: Թող խիզախություն ունենան գոնե մեկ րոպե նայել այս իրականությանը»:

Մանրամասն՝ տեսանյութում։