Ձեր վստահելի աղբյուրը

Ցանկացած պետություն պարտավոր է միջազգային իրավունքի նորմերին հետևել, այդ թվում՝ ՄԱԿ-ի կանոնադրությանը և միջազգային  մարդասիրական իրավունքների նորմերին։ Հայաստանի խնդրանքով հրավիրված ՄԱԿ-ի Անվտանգության խորհրդի արտահերթ նիստում հայտարարեց ՄԱԿ-ի ԱԽ-ում Ճապոնիայի ներկայացուցիչ Իսիկանե Կիմիհիրոն։

«Մենք ի գիտություն ենք ընդունել Հայաստանի և Ադրբեջանի՝ Անվտանգության խորհրդին բաժանած նամակները։ Երկու կողմերի փաստարկները տարբեր բացատրություններ են պարունակում։ Այդուհանդերձ, տեղում մարդկանց ապրուստը, կյանքը երաշխավորելը պետք է առաջնահերթ լինի, մասնավորապես՝ ամենախոցելիների համար։ Հիվանդների, տարեցների, կանանց, երեխաների կյանքը չպետք է սպառնալիքների ներքո լինի»,- ասաց նա։

Նրա խոսքով՝ ի գիտություն են ընդունում ՄԱԿ-ի գլխավոր քարտուղարի կոչը՝  վերականգնել տեղաշարժը Լաչինի միջանցքով և հաշվի առնել, որ պետք է շտկել մարդասիրական իրավիճակը տեղում։

«ԿԽՄԿ-ն ներկայումս դժվարութուններ ունի մարդասիրական օգնությունը քաղաքացիական բնակչությանը Լաչինի միջանցքով հասցնելու գործում կամ որևէ այլ ուղիով։ Նա կոչ է անում որոշում կայացնողներին թույլ տալ, որպեսզի վերսկսի իր մարդասիրական  գործունեությունը տարածքում։ Մարդասիրական հասանելիությունը միջազգային կազմակերպությունների համար պետք է անխոչընդոտ լինի։ Կողմերին կոչ ենք անում հնարավորինս շուտ ապահովել հասանելիությունը։

Բացի այդ, Արդարադատության միջազգային դատարանը փետրվարի 22-ին պայմանական միջոցներ է կարգադրել, այդ թվում՝ ապահովել անձանց, տրանսպորտային միջոցների և բեռների անխափան տեղաշարժը Լաչինի միջանցքով երկու ուղղությամբ:

Մենք վերահաստատում ենք, որ իրավունքի գերիշխանությունը պետք է հաստատվի, դա մեր մնայուն դիրքորոշումն է: Ցանկացած պետություն պարտավոր է միջազգային իրավունքի նորմերին հետևել, այդ թվում՝ ՄԱԿ-ի կանոնադրությանը և միջազգային մարդասիրական իրավունքների նորմերին։
Հակամարտության վերջնական հանգուցալուծումը Հայաստանի և Ադրբեջանի միջև շատ կարևոր է Կովկասի տարածաշրջանում խաղաղության և կայունության համար։

Անվտանգության խորհուրդը, որի խնդիրը միջազգային խաղաղության և անվտանգության պահպանումն է, պետք է հավատարիմ և հանձնառու լինի այս խնդրին։ Երկխոսությունը Հայաստանի և Ադրբեջանի միջև կարևոր է, մենք հույս ունենք, որ այն թույլ կտա վեճը լուծել խաղաղ ճանապարհով՝ միջազգային իրավունքի նորմերին համապատասխան»,- ընդգծեց ՄԱԿ-ի ԱԽ-ում Ճապոնիայի ներկայացուցիչը։