Ձեր վստահելի աղբյուրը

Կարմիր խաչի ներկայացուցիչների հետ հանդիպումից հետո, հանդիպմանը մասնակից  երիտասարդը  հավաքավածներին փոխանցեց, որ  Կարմիր խաչը նման հայտարարությն չի տարածելու։

Հիշեցնենք, որ այս պահին Կարմիր խաչի գրասենյակի մոտ շարունակվում է մի խումբ արցախցիների բողոքի ակցիան։ Նրանք ուզում են պարզաբանում ստանալու, թե «ինչ հիմնավորմամբ է Բաքուն մերժել Գյումրի-Երևան ճանապարհի ողբերգության զոհերից արցախցի 21-ամյա Հելեն Դադայանի մարմինն Արցախ տեղափոխելու շուրջ ձեռք բերված նախնական համաձայնությունը» և պահանջում են ԿԽՄԿ-ից հանդես գալ հայտարարությամբ՝ առ այն, որ ադրբեջանական կողմը խոչընդոտներ է ստեղծում՝ Հելեն Դադայանի դիակը  Արցախ տեղափոխելու համար, որպեսզի ընտանիքը հրաժեշտ տա աղջկան։

«Կարմիր խաչը հայտարարություն չի տարածելու, որ մյուս կողմն է խոչընդոտել։ Նրանք նաև ասացին՝ ակցիան շարունակելու դեպքում հայտարարություն կտարածեն, որ գերեվարված են»,- փոխանցեց  երիտասարդը։

Հավաքված արցախցիներին վրդովվեցրեց  ԿԽՄԿ ներկայացուցիչների պատասխանը։ Նրանք հիշեցրին, որ այժմ  գերեվարված են 120 000 արցախիներ։

«Կարմիր խաչը, համաձայն իր մանդատի, պարտավոր է հանրային իրազեկում իրականացնելու, իհարկե պահելով չեզոքություն։ Սակայն այս պարագայում, երբ կողմերից մեկը խոչընդոտում է իրենց գործունեությանը, պարտավոր են հանրային իրազեկում իրականացնել՝ բանակցություններ վարելու համար ներառելով այլ կազմակերպությունների։ Դա իրենց պարտավորությունն է և դա կարող են անել։ Մենք  իրենց մանդատից դուրս ոչինչ չենք պահանջում, պահանջում ենք իրենց մանդատի շրջանակներում մնալ։ Նրանք ունեն  գործիքակազմ՝ բանակցություններ վարելու և մենք պահանջում ենք ներկայացնել, թե ինչպես են վարում բանակցությունները։ Սա արժանապատվության ոտնահարում է, զոհված մարդու արժանապատվության հարց է։ Հանրային իրազեկում ենք պահանջում Կարմիր Խաչի կողմից»,- հայտարարեց արցախցի կինը։ 

Բողոքի ակցիայի մասնակիցները հայտարարեցին, որ չեն հեռանալու ԿԽՄԿ շենքի մոտից այնքան ժամանակ, մինչև չիրականանա իրենց պահանջը։

Ավելի մանրամասն՝ տեսանյութում։