Ձեր վստահելի աղբյուրը

Իրանագետ Վարդան Ոսկանյանը գրում է. 

«Այսօր թշնամին կրակել է Կապանի օդանավակայանի շենքի վրա՝ այն նույն օդանավակայանի, որտեղ երեկ վայրէջք էր կատարել հենց Բաքվի բարբարոսական վարչախմբի պարագլխի հետ բանակցողի ինքնաթիռը։

Սա նշանակում է, որ եթե թշնամին չպատժվի, ապա վաղ թե ուշ կրակելու է նաև մայրաքաղաք Երևանի, առանձին-առանձին վերցրած, բոլոր շենքերի վրա՝ նաև այն շենքերի, որտեղ մենք խնամքով երեխա ենք մեծացնում։ Մինչդեռ ամբողջ Հայաստանը քննարկում է արդեն իսկ կալանավորված մոլագարի գործողություններ պատկերող կամ պատվերով նկարված ինչ-որ տեսանյութ»։

Հիշեցնենք՝ ԱԱԾ-ից ահսօր ավելի վաղ հայտնել էին, որ օգոստոսի լույս 18-ի գիշերը ժամը 04։24-ին ադրբեջանական կողմից, դեռևս չպարզաբանված ավտոմեքենայով Հայաստան-Ադրբեջան սահմանագծի ՀՀ Սյունիքի մարզի Կապանի «Սյունիք» օդանավակայանի հարակից տարածք եկած անհայտ անձը Ադրբեջանի տարածքից երեք կրակոց է արձակել Կապանի «Սյունիք» օդանավակայանի ուղղությամբ և հեռացել։ փամփուշտներից երկուսը վնասել են օդանավակայանի պատուհաններից մեկը և տանիքը։

Հիշեցնենք նաև, որ  նախօրեին Նիկոլ Փաշինյանն այցելել էր Սյունիքի մարզ` Երևանի «Զվարթնոց» օդանավակայանից իրականացված ավիաչվերթով: Նիկոլ Փաշինյանը շրջել էր «Սյունիք» օդանավակայանում և ծանոթացել ստեղծված պայմաններին: Օգոստոսի 19-ին` Կապանի օրվա առիթով կլինի Երևան-Կապան ներկայացուցչական չվերթ, որից հետո արդեն հաջորդ շաբաթվանից նախատեսվում են կանոնավոր չվերթներ: