Ժայռամագլցումից մինչև վայրեր, որոնց մասին լեգենդներ են պտտվում. Ի՞նչ է առաջարկում Ջերմուկը հյուրերին
Ժայռամագլցումից, թռիչք բարձրությունից մինչև պասիվ հանգիստ՝ հանքային ջրով վաննաներ, ինհալյացիաներ, աղի սենյակ, արոմաթերապիա, տորֆաբուժություն, մաքուր օդ, զով եղանակ, սաղարթախիտ ծառեր, մաքուր փողոցներ, մշակութային զանազան միջոցառումներ։ Ահա այն ամենը, ինչ տեղացի ու օտարերկրացրի զբոսաշրջիկներին առաջարկում է լեռնային քաղաքը։
Հյուրընկալ Ջերմուկում անցած տարվա սեպտեմբերի պատերազմից հետո մարդկանց հոսքը շատ է նվազել։ Տեղացիներն այս փաստից տխրել են, բայց չեն վհատվել՝ մտածելով հյուրերին բերելու նոր գրավչություններ։ Քաղաքի բնակչության շուրջ 70-80%-ն ընդգրկված է սպասարկման ոլորտում, զբոսաշրջիկների թվի նվազումն ազդում է յուրաքանչյուր ընտանիքի բյուջեի վրա։
Ջերմուկի զարգացմանը միտված մեդիատուրի շրջանակներում Ջերմուկ մեկնած Panorama.am-ի նկարահանող խմբին առողջարանային համալիրներից մեկի գլխավոր մատենավար Քրիստինե Իվանյանը պատմեց՝ առողջարանային քաղաքը տարվա առաջին կեսին հյուրընկալում է հիմնականում հայաստանցիներին, իսկ երկրորդ կեսին՝ օտարերկրյա հյուրերին, որոնց թվում գերակշռում են Ռուսաստանից այցելուները։
«Նախորդ տարվա այս ժամանակահատվածում հյուրանոցների զբաղվածությունը 100% էր, հիմա՝ 50-60%»,-ասաց նա՝ ընդգծելով, որ զգալիորեն կրճատվել է Ջերմուկը որպես հանգստի ուղղություն նախընտրող հայաստանցիների թիվը։
Այս տնտեսվարողը 10-15% գնիջեցում է կատարել՝ պահպանելով առաջարկվող բոլոր ծառայությունների քանակն ու որակը։
Ջերմուկում գործող առողջարաններն ու հյուրանոցային համալիրները տալիս են բուժական պրոցեդուրաների ընտրության լայն հնարավորություն։ Յուրաքանչյուր հանգստացողի պրոցեդուրաները նշանակում է համալիրում աշխատող բժիշկը՝ լսած գանգատների, հարկ եղած դեպքում նաև հետազոտությունների արդյունքների հիման վրա։ Այստեղ շեշտը դրվում է հատկապես հանքային ջրերով պրոցեդուրաների վրա։
«Կազմակերպվում են ընդհանուր հանքային լոգանքներ, տարբեր խոռոչավոր օրգանների ողողումներ, չորսխցիկանի տեղային լոգանքներ՝ հաշվի առնելով հիվանդության ընթացքը, բուժառուի ընդհանուր վիճակը և ուղեկցվող այլ հիվանդությունները»,-ասաց առողջարաններից մեկի գլխավոր բժիշկ Հասմիկ Սարգսյանը։
Ընկերուհու խորհրդով Իտալիայից ժամանած Դոմինիկոն տպավորված է առողջարանային քաղաքի թարմ օդով ու բուժիչ ջրերով։ Մինչ այստեղ հասնելը հիացել է Հայաստանի այլ տեսարժան վայրերով։
«Հանքային ջրով առաջին ինհալացիայից հետո զգում եմ դրական փոփոխություն»,-ասաց նա լրագրողների հետ զրույցում։
Իտալացին օրը երկու անգամ Ջերմուկի հայտնի ըմպելասրահ է գնում՝ ընդունելու հանքային ջուրը։
30 - 55 աստիճան տաքությամբ հանքային ջուրն այցելուներն ընդունում են բժշկի ցուցումով։
Օրինակ, 30 աստիճան տաքությամբ ջուրը նշանակում են մարսողական համակարգի խնդիրներ ունեցողներին, ավելի բարձր ջերմաստիճանով ջուրը՝ շնչառական ուղիների խնդիրներ ունեցողների համար։ Բժիշկներն ասում են՝ նույնիսկ ըմպելու ձևն է կարևոր։
Հանքային ջրով լոգանք հյուրերը կարող են ընդունել նաև բնական միջավայրում։ Բնական գեյզեր հասնել, ինչպես պնդում են տեղացիները, կարելի է միայն բարձր անիվ ունեցող մեքենաներով։ Բնական ջակուզի հասնելու համար կպահանջվի 30 րոպե ու 25 հազար դրամ։
Խորհուրդ է տրվում թերմալ լողավազանում մնալ ոչ ավելի, քան 5 րոպե՝ կատարելով ընդմիջումներ:
Ժայռերով հարուստ քաղաքում չեն հասցնի ձանձրանալ էքստրիմի սիրահարները։ Մագլցումը կատարվում է մշակված ժայռամագլցման ուղիներով, համապատասխան գույքով և հանդերձանքով: Ժայռի ընտրությունը ևս կատարվում է հատուկ մասնագետների կողմից՝ կախված քարի տեսակից և բարդության աստիճանից։ Տեղացիներն ու տուրիստներն առավել նախընտրում են մագլցել Սուրբ Փոկասի ժայռախումբը՝ սերտիֆիկացված մասնագետների ուղեկցությամբ և պատասխանատվությամբ։
Քաղաքի առավել մարդաշատ վայրերից է «Ջրահարսի վարսեր» կոչվող ջրվեժը, որի անվան հետ կապված հետաքրքիր լեգենդ են պատմում իշխանի դստեր ու աղքատ տղայի սիրո պատմության մասին: Ըստ ավանդության՝ իշխանը դեմ էր դստեր և աղքատ տղայի միությանը, իսկ աղջիկն իր երկար ծամերն օգտագործելով տղային օգնում է ամրոց բարձրանալ։ Երբ հայրը տեսնում է դա, անիծում է, դուստրը քար է դառնում, իսկ վարսերը ժայռից թափվում են ցած։
Այստեղ մի հուշարձան էլ կա, որի մասին լեգենդ են պատմում։ Բախտի կամ Երջանկության կամարը ներառված է ԲՆ բնության պետական հուշարձանների ցանկում։ Ասում են՝ կամարի տակով անցնելիս եթե երազանք պահես, այն կիրականանա։
Անցնող օգոստոսը Ջերմուկում հայտարարված է մշակութային ամիս։
Հայաստանի ազգային պատկերասրահի Ջերմուկի մասնաճյուղում, որը հիմնադրվել է 1972 թվականին, մշտական ցուցադրության է ներկայացված 1920-1990 թթ. ստեղծված շուրջ 100 գեղանկար և քանդակ։ Այցելուները կարող են տեսնել հայ նշանավոր գեղանկարիչների՝ Մ. Սարյանի, Վ. Գայֆեճյանի, Հ. Կալենցի, Հ. Հակոբյանի, Մ. Պետրոսյանի և այլոց աշխատանքները:
««Ջերմուկի զբոսաշրջության գրավչությունը մշակույթի ներքո» ծրագրի շրջանակում կազմակերպվում են երեկոյան բացօթյա համերգներ, կավագործության ու նկարչության վարպետաց դասեր։ Այստեղ մշակութային միջոցառումները կամփոփվեն օգոստոսի 27-ին: Մինչ այդ նախատեսվում է նաև քաղաքի արխիվային նյութերի, հատակագծերի, լուսանկարների բացառիկ ցուցադրություն՝ Հայաստանի ազգային արխիվի հետ համատեղ:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
