Ձեր վստահելի աղբյուրը

Գյումրի-Երևան ճանապարհի ողբերգության զոհերից արցախցի 21-ամյա Հելեն Դադայանի աճյունը թշնամի Ադրբեջանի կողմից ճանապարհն ապօրինի փակ լինելու պատճառով դեռ հնարավոր չի եղել տեղափոխել հայրենի հող։ Նրա մորեղբայրը դիմել էր Կարմիր խաչի միջազգային կոմիտե և Արցախի իշխանությանը՝ աղջկա մարմինն Արցախ տեղափոխելու հարցով։ Սակայն դեռ ...

Այսօր ֆեյսբուքյան օգտատեր Վարդան Հարությունյանը գրել է.

«Օրեր առաջ Գյումրի-Երևան ողբերգական ավտովթարի զոհ դարձած արցախցի՝ ճարտարցի Հելեն Դադայանի աճյունը Արցախ տեղափոխելու հարցով կարմիր խաչը նախնական համաձայնության էր եկել Բաքվի հետ, որ այսօր տեղափոխեն Արցախ։ Սակայն Բաքուն այսօր առավոտյան մերժել է»։

Կարմիր խաչի միջազգային կոմիտեի հաղորդակցման ծրագրերի ղեկավար Զառա Ամատունին Panorama.am-ի հետ զրույցում ասաց, որ փորձում են շարունակել երկխոսությանը Հելեն Դադայանի աճյունի տեղափոխության շուրջ՝ հույս ունենալով, որ կողմերի համապարփակ համաձայնություն կլինի տեղափոխության շուրջ, որպեսզի իրենք էլ կարողանան իրենց գործողությունը կատարել։

«Սա մեր իրավասության մեջ չի գտնվում։ Մենք չենք որոշում կայացնողը, մենք միջնորդ ենք այդ հարցում, որոշում կայացնում են կողմերը։

Մեզ համար կարևոր է հարցը շարունակաբար ուշադրության կենտրոնում պահել՝ հույս ունենալով որևէ փոփոխություն կլինի ու գործողությունը հնարավոր կդառնա։

Մենք որևէ երաշխիք չենք տալիս, միայն ասում ենք՝ պատրաստակամ ենք և կանենք ամենը, սակայն որոշում են կողմերը»,- նշեց նա։

Հելեն Դադայանը Արցախի Ճարտար գյուղից էր։ Նրա ընտանիքն այժմ շրջափակման մեջ է։ Հելենը սովորում և աշխատում էր Եվրասիա Համալսարանում։

Հիշեցնենք, օգոստոսի 14-ին՝ ժամը 00։20-ի սահմաններում, Երևան-Գյումրի ավտոճանապարհի 90-րդ կիլոմետր հատվածում միմյանց են բախվել «Զիլ» և «Վոլկսվագեն» մակնիշի տրանսպորտային միջոցները, որի հետևանքով վերջինիս վարորդը և 10 ուղևոր մահացել են, իսկ «Զիլ» մակնիշի ավտոմեքենայի վարորդը և «Վոլկսվագեն» մակնիշի ավտոմեքենայի 5 ուղևոր, մարմնական վնասվածքներով, տեղափոխվել են բժշկական կենտրոն։
Դատախազը օգոստոսի 17-ին հանրային քրեական հետապնդում է հարուցել Հ.Պ.-ի նկատմամբ՝ Քրեական օրենսգրքի 342-րդ հոդվածի 3-րդ մասով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը, որն անզգուշությամբ առաջացրել է երկու կամ ավելի մարդու մահ):