Ձեր վստահելի աղբյուրը

Գյումրի-Երևան ավտոճանապարհին օգոստոսի 14-ին տեղի ունեցած ողբերգական վթարի հետևանքով զոհված արցախցի 21-ամյա Հելեն Դադայանի մարմինը դեռ Գորիսի դիահերձարանում է. թշնամի երկիրը թույլ չի տալիս աճյունը տեղափոխել ծննդավայր՝ Ճարտար, հուղարկավորելու։  Ընտանիքի միակ ցանկությունն է՝ իրենց աղջկան հուղարկավորել հայրենի հողում։

«Ծնողներն ուզում են Հելենի մարմինն անպայման տեղափոխվի Արցախ։ Միանշանակ է՝ իրենք Արցախից գնալու որևէ տեղ չունեն, Արցախը որևէ կերպ այլ կարգավիճակում չեն պատկերացնում»,- Panorama.am-ի հետ զրույցում ասում է Հելենի մորեղբոր կինը՝ Նարինե Հարությունյանը։

Հելենի հարազատները, ընտանիքի անդամները դիմել են Կարմիր խաչի միջազգային կոմիտեի հայաստանյան գրասենյակ, ռուսական խաղաղապահ զորախմբի հրամանատարին։

«Որևէ նորություն չկա, սպասում ենք պատասխանի։ Փաստաթղթեր պետք է հանձենք Կարմիր խաչի միջազգային կոմիտեին։ Հիմա մահվան վկայականն են ուզել, Արցախից պետք է ուղարկեն։ Հույս ունենք, որ մի բան կանեն։ Ռուս խաղաղապահների հրամանատարն էլ խոստացել է՝ եթե որևէ պատասխան չլինի Կարմիր խաչից, իրենք կփորձեն աճյունը տեղափոխել։

Աշխատանքներ տարվում են, տեսանելի է, մարդիկ սրտացավ են, բոլորն էլ ուզում են օգնել, բայց, ցավոք սրտի, մեր թշնամին դաժան է»,- նշում է Ն. Հարությունյանը։

Արցախում տեղակայված ռուսական խաղաղապահ ուժերի հրամանատար Ալեքսանդր Լենցովն առաջարկել է այլ տարբերակ էլ՝  «եթե չստացվի մարմինը տեղափոխել, ապա պետք է բանակցեն, որպեսզի ծնողները գնան ու մասնակցեն հուղարկավորությանը»։

«Առաջնային այն է, որ դիակը տեղափոխվի Արցախ»,- ընդգծում է Հելենի մորեղբոր կինը։

Հելենը վերջին անգամ Արցախում եղել է ուղիղ մեկ տարի առաջ։ 2022-ի օգոտոսին եկել է Երևան, սակայն դեկտեմբերին շրջափակումից հետո չի կարողացել վերադառնալ հայրենիք։ Ճարտարում նրան «սպասում են» հայրը, մայրը, քույրը, եղբայրը։

«Բոլորը պատրաստ են օգնել, աջակից լինել, ակցիաներ անել Հելենի մարմինը տեղափոխելու համար, բայց ցավոք, ինչպես նշեցի, մեր թշնամին  դաժան է։ Նման թշնամու հետ այն տարբերակը, որ կարելի է խաղաղության գնալ ու ապրել,... մարդիկ ինչպես են վերաբերվում 21 տարեկան աղջկա դիակի հետ։ Եթե թվում է  խաղաղություն կնքելուց հետո մարդկանց, դիակների հետ այսպես չեն վերաբերվելու, աբսուրդի ժանրից է»,- ասում է Նարինե Հարությունյանը։

Հիշեցնենք, որ ավելի վաղ Կարմիր խաչի միջազգային կոմիտեի հաղորդակցման ծրագրերի ղեկավար Զառա Ամատունին Panorama.am-ի հետ զրույցում ասել էր, որ փորձում են շարունակել երկխոսությանը Հելեն Դադայանի աճյունի տեղափոխության շուրջ՝ հույս ունենալով, որ կողմերի համապարփակ համաձայնություն կլինի տեղափոխության շուրջ, որպեսզի իրենք էլ կարողանան իրենց գործողությունը կատարել. «Սա մեր իրավասության մեջ չի գտնվում։ Մենք չենք որոշում կայացնողը, մենք միջնորդ ենք այդ հարցում, որոշում կայացնում են կողմերը»։

Հիշեցնենք, օգոստոսի 14-ին՝ ժամը 00։20-ի սահմաններում, Երևան-Գյումրի ավտոճանապարհի 90-րդ կիլոմետր հատվածում միմյանց են բախվել «Զիլ» և «Վոլկսվագեն» մակնիշի տրանսպորտային միջոցները, որի հետևանքով վերջինիս վարորդը և 10 ուղևոր մահացել են, իսկ «Զիլ» մակնիշի ավտոմեքենայի վարորդը և «Վոլկսվագեն» մակնիշի ավտոմեքենայի 5 ուղևոր, մարմնական վնասվածքներով, տեղափոխվել են բժշկական կենտրոն։
Դատախազը օգոստոսի 17-ին հանրային քրեական հետապնդում է հարուցել Հ.Պ.-ի նկատմամբ՝ Քրեական օրենսգրքի 342-րդ հոդվածի 3-րդ մասով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը, որն անզգուշությամբ առաջացրել է երկու կամ ավելի մարդու մահ):