Ձեր վստահելի աղբյուրը

Նիկոլ Փաշինյանը կառավարության այսօրվա նիստում իրենց հասած «հավաստի տեղեկություններ» փոխանցեց Արցախի ու Հայաստանի հասարակությանը՝ «ծրագրեր են մշակվում Լաչինի միջանցքը միակողմանիորեն բացելու, այսինքը՝ ԼՂ-ից ելք թույլ տալու և մուտք թույլ չտալու ուղղությամբ»։ Դրանից հետո Հատուկ հանձնարարություններով դեսպան Էդմոն Մարուքյանը X-ի (նախկինում «Թվիթեր») իր միկրոբլոգում գրեց, որ Ադրբեջանը Լեռնային Ղարաբաղում էթնիկ զտումների դասական քաղաքականություն է վարում. «Մեր տեղեկություններով Բաքուն ծրագրում է միակողմանի բացել Լաչինի միջանցքը, որպեսզի Լեռնային Ղարաբաղի հայերին դուրս մղի տարածքից՝ առանց վերադարձի հնարավորության»։

Panorama.am-ը Արցախի Հանրապետության ԱԺ «Արդարություն» խմբակցության ղեկավար Դավիթ Գալստյանի հետ խոսեց այս հայտարարությունների ու  իշխանության քայլերի մասին։

Panorama.am-Պարոն Գալստյան, դուք ի՞նչ տեղեկություն ունեն Փաշինյանի այսօր հայտնած «հավաստի տեղեկությունների» մասին։

Դավիթ Գալստյան- Ցավոք սրտի, պետք է արձանագրենք, որ Նիկոլ Փաշինյանը հենց կոչված է Արցախն Ադրբեջանին բռնակցելուն, և իրենց արած քայլերով կամ անգործության պատճառով մենք հայտնվել ենք այսպիսի իրավիճակում։ Փոխանակ Նիկոլ Փաշինյանն ու իր կառավարությունը միջոցներ ձեռնարկեն, գործնական քայլերով փորձեն հանգուցալուծել, տեսնում ենք, որ Նիկոլ Փաշինյանն ընդամենն ինչ-որ փաստեր է արձանագրում, ինչ-որ տեղեկություններ ասում, բայց չեն խոսում այն մասին, թե ինչպես առնել այդ ամենի դեմը, ինչ քայլեր կատարել։

Սա մեզ ավելի է հիասթափեցնում, որ ունենք նմանատիպ իշխանություններ, որոնք պետք է զբաղվեն  հայերի խնդիրներով, հայերի շահերն առաջ տանեն, տեսնում ենք, ցավոք սրտի, որ  այդ մարդն ընդամենն այս ամենի մաս է կազմում և իր հետ միասին է  այդ ծրագիրը կյանքի կոչվում։ Երևի իր բարեկամ կամ կիրթ ընկերն է իրեն այդ հավաստի տեղեկությունները տվել։

Այլ տեղեկություններ չունեմ, ցավոք սրտի։ Տեսանելի  դաշտում  Հայաստանի օրվա իշխանության կատարած աշխատանքն անբավարար է այս իրավիճակը հանգուցալուծելու համար։ Փոխանակ լծվեն իրավիճակի հանգուցալուծմանը, Ադրբեջանի նույն հռետորաբանությամբ են խոսում, իրենք իրենց ամեն ելույթով ավելի են ընկճում ու փորձում հիասթափեցնել։

Panorama.am-Նախապես ծրագրված է եղե՞լ։

Դավիթ Գալստյան- Գնալով  համոզվում եմ, որ այո, հենց Լաչինի միջանցքը փակելու, արցախահայությանն  ընկճելու ծրագրի մեջ է Նիկոլ Փաշինյանն ի սկզբանե, քանի որ եթե հետադարձ հայացք նետենք Փաշինյանի՝ մինչև վարչապետ լինելը, փողոցային պայքարի ժամանակ նրա ատելությունն արցախահայության նկատմամբ, այսօր կյանքի է կոչում թուրք-ադրբեջանական տանդեմի հետ համատեղ։

Panorama.am-Ըստ ձեզ, Արցախի իշխանությունը տեղյա՞կ է այս «հավաստի տեղեկություններին», հաշվի առնելով, որ վերջին շրջանում շատ է խոսվում  Ակնա-Ստեփանակերտ ճանապարհի գործարկման մասին։

Դավիթ Գալստյան-Ես չեմ կարող հստակ ասել՝ Արցախի իշխանությունները տեղյակ են, թե ոչ, բայց որ Արցախի իշխանության անգործությունը, ի դեմս Արայիկ Հարությունյանի, ևս տեսանելի է, դա արձանագրված փաստ է։

Panorama.am-Եթե այդ «հավաստի տեղեկություններ»-ը իրականություն դառնան, այսինքն Լաչինի միջանցքը միակողմանի բացվի, Արցախի ժողովուրդը դուրս կգա՞ Արցախից՝ նկատի ունենալով այն հանգամանքը, որ չեն կարողանալու վերադառնալ հայրենիք։

Դավիթ Գալստյան-Ես համոզված եմ, որ Արցախի ժողովուրդը պայքարող ժողովուրդ է, չի հանձնվելու, ամեն ինչ անելու է, որպեսզի Արցախը պահի հայկական ի հակառակ Նիկոլ Փաշինյանի կամ Արայիկ Հարությունյանի կամքի։

Panorama.am-Շնորհակալոթյուն հարցերին պատասխանելու համար։