Ձեր վստահելի աղբյուրը

Օգոստոսի 24-ին Վրաստանում նշում են Սահմանադրության օրը։Jnews-ի փոխանցմամբ՝ օրվա առթիվ երկրի քաղաքացիներին շնորհավորել է վարչապետ Իրակլի Ղարիբաշվիլին։

Ինչպես նշվում է վարչապետի հայտարարության մեջ, այս օրը միասնության պահ է, որը ևս մեկ անգամ հաստատում է պայծառ ապագա՝ միասնական, խաղաղ, ուժեղ, զարգացած Վրաստան կառուցելու ընդհանուր որոշումը։

«Օգոստոսի 24-ը մեր պետականության կարևորագույն օրն է: 1995 թ.-ի այս օրը անկախ Վրաստանի խորհրդարանն ընդունելով երկրի գերագույն օրենքը, մեր պատմության մեջ սկսեց նոր փուլ՝ քաղաքացիական միասնության, օրենքի գերակայության, ազատության, իդեալների վրա հիմնված պետության կառուցումը:

Վրաստանի Սահմանադրությունը՝ մեր պայմանագիրն է միմյանց և պետության հետ, հիմնված մեծ պատմության և մշակութային արժեքների վրա։ Միևնույն ժամանակ, այն ուրվագծում է նոր նպատակներ և անելիքներ ժամանակակից դարաշրջանում՝ երկրի և ժողովրդի առաջընթացի և զարգացման համար։

Այս օրը հանդիսանում է միասնության պահ, որը ևս մեկ անգամ վերահաստատում է մեր ընդհանուր որոշումը՝ կառուցելու պայծառ ապագա՝ միասնական, խաղաղ, ուժեղ, զարգացած Վրաստան»,- ասված է Իրակլի Ղարիբաշվիլիի ուղերձում։

1995 թվականի օգոստոսի 24-ին Վրաստանի խորհրդարանը 159 կողմ և 8 դեմ ձայներով ընդունեց երկրի հիմնական օրենքը։

Այդ օրվանից հետո Վրաստանի Սահմանադրությունը փոփոխության է ենթարկվել ավելի քան 30 անգամ։ Վրաստանի երրորդ նախագահ Միխեիլ Սաակաշվիլիի օրոք պետության հիմնական օրենքում ավելի քան 20 փոփոխություն է կատարվել։