Ձեր վստահելի աղբյուրը

Ո՞վ է Երևանի քաղաքապետի ամենահարուստ թեկնածուն ու որքա՞ն գումար, քանի՞ միավոր անշարժ գույք ունեն մյուսները։ ՍիվիլՆեթն ուսումնասիրել է թեկնածուների՝ Կենտրոնական ընտրական հանձնաժողով ներկայացրած հայտարարագրերը՝ հաշվետու տարվա 2022-ի օգոստոսից 1-ից մինչև 2023-ի օգոստոսը։

Տիգրան Ավինյան. 7 մլն դրամ՝ բիթքոյնի վաճառքից

«Քաղաքացիական պայմանագրի» քաղաքապետի թեկնածու, Երևանի քաղաքապետի տեղակալ Տիգրան Ավինյանը, ըստ ներկայացրած հայտարարագրի, ունի ընդամենը մեկ ավտոտնակ Խանջյան փողոցում։ Նա 2022-ին նվիրատվություն է «Վոլկսվագեն» մակնիշի էլեկտրական մեքենա։ Պարոն Ավինյանի եկամուտները միայն քաղաքապետարանի աշխատավարձից չեն կուտակվում, նա նաև բիթքոյնի վաճառքից է գումարներ աշխատել՝ հաշվետու տարում ավելի քան 7 մլն դրամ։ «Հայբիզնեսբանկի» խորհրդի անդամի պաշտոնից ստացել է 4 մլն դրամ եկամուտ, ինչպես նաև 11 մլն դրամ նվիրատվություն հորից՝ Արմեն Ավինյանից։

Ավինյանի դրամական միջոցները կազմում են շուրջ 14 մլն դրամ, 2,4 բիթքոյն ու 3 100 դոլար։

Հայկ Մարության. տներ Պրահայում և Վիեննայում

Քաղաքապետի ամենահարուստ թեկնածուն դերասան Հայկ Մարությանն է՝ Ազգային առաջընթացի առաջին համարը։ Նա ունի շուրջ 15 մլն դրամ, 250 հազար եվրո, շուրջ 270 հազար դոլար ու ավելի քան 2 մլն չեխական կրոն։

Հայկ Մարությանի՝ Չեխիայի բնակարանների մասին շատ է խոսվել, սակայն Կենտրոնական ընտրական հանձնաժողովին ներկայացրած հայտարարագրում, տեսնում ենք նոր անշարժ գույքեր Ավստրիայի մայրաքաղաք Վիեննայում՝ 2 բնակարան՝ 62 և 41 քառակուսի մետր մակերեսով։ Անդրադառնալով Մարությանի չեխական տներին, դրանք մեկ էջից ավելի են հայտարագրում, նա ունի 5 բնակարան, հողամասեր, ավտոկայանատեղիներ, անգամ բնակելի տներ, մեծ մասը հենց Պրահայում։ Ամենահամեստը պարոն Մարությանի վարձակալությամբ ձեռք բերված տունն է Կոտայքի մարզի Առինջ գյուղում։

Ավտոմեքենա Մարությանը չունի, ըստ ամենայնի նորից հեծանիվով է տեղաշարժվում կամ նոր ավտոբուսներով։ Նրա եկամուտները կուտակվում են մի քանի աղբյուրներից՝ Չեխիայի տների վարձակալությունից, ինչպես նաև իրեն պատկանող «ԱԱԱ Փրոջեքթս» ընկերությունից, մեկ տարում 58 մլն դրամ միայն շահաբաժնից։ Սա ըստ ամենայնի, նրա ներկայացումից ստացված գումարներն են։

Անդրանիկ Թևանյան. կանխիկով միլիոնատեր թեկնածուն

Հաջորդ հարուստ թեկնածուն Անդրանիկ Թևանյանն է՝ «Մայր Հայաստան» դաշինքից։ Պարոն Թևանյանը, ըստ ամենայնի, ամեն կերպ մերժում է երկրի վարչապետի հորդորները՝ կանխիկով գումար չպահել։ Նա, ըստ ներկայացրած հայտարարագրի, ունի 25 մլն դրամ ու 110 հազար եվրո կանխիկ գումար, իսկ անկանխիկ՝ 120 հազար դոլար ու 138 հազար դրամ։

Թևանյանը վարում է 2018-ի արտադրության Հոնդա։ Ունի բնակարան Մաշտոցի պողոտայում, ավտոտնակ և հողամաս Կոտայքի մարզում։ Եկամուտները կուտակվել են պատգամավորի աշպատավարձից՝ ավելի քան 9 մլն դրամ։

Մանե Թանդիլյան. եկամուտը միայն մեկ անձի օգնությունից

Ապրելու երկիր կուսակցության քաղաքապետի թեկնածու Մանե Թանդիլյանը, ըստ հայտարարագրի, ունի 180 հազար դրամ։ Նրա եկամուտները, հաշվետու տարում, ձևավորվել են միայն մեկ անձի օգնությունից՝ 5 000 դոլար։ Թանդիլյանն ունի նաև բնակարան Երևանում ու Ալավերդիում։

Արտակ Զեյնալյան. քաղաքապետի մյուս հարուստ թեկնածուն

Իրավաբան, արդարադատության նախկին նախարար Արտակ Զեյնալյանը հարուստ թեկնածուներից է։ Նա ունի ավելի քան 26 մլն դրամ, 110 հազար եվրո ու 4 500 դոլար։ Նրա եկամուտները կուտակվել են ձեռնարկատիրական գործունեությունից ու կենսաթոշակից։ Տրանսպորտային միջոցներից պարոն Զեյնալյանը վարում է 2017-ի արտադրության «Տոյոտա»։ Նա ունի 3 բնակարան Երևանում և մեկ ավտոտնակ։

Դավիթ Խաժակյան. երիտասարդ թեկնածուի երևանյան բնակարանները

Քաղաքապետի երիտասարդ թեկնածուներից Դավիթ Խաժակյանը հայտարարագրել է ավելի քան 5 մլն դրամ ու 2 հազար դոլար։ Լուսավոր Հայաստանի առաջին համարի եկամուտները կուտակվել են տեղեկատվական տեխնոլոգիաների ոլորտի գործունեությունից՝ 27 մլն դրամ, բուհերից մեկից ու Երևանի քաղաքապետարանից։ Ըստ հայտարարագրի՝ նա Երևանում՝ Սևակ, Աբովյան ու Դեմիրճյան փողոցներում 3 բնակարանների համասեփականատեր է։ Տրանսպորտային միջոցներից վարում է 2007-ի արտադրության «Մերսեդես»։

Արտակ Գալստյան. ոչինչ ունեցող թեկնածուն

Ըստ հայտարարագրի՝ բացարձակ ոչինչ չունի Հանրային ձայն կուսակցության քաղաքապետի թեկնածուն՝ Արտակ Գալստյանը։ Նա կալանավորված է առանձնապես խոշոր չափերով շորթում կատարելու քրեական գործի շրջանակներում։ Պարոն Գալստյանի հայտարարագրում ոչ մի նշում չկա։

Նորայր Նորիկյան. փաստաբան թեկնածուն

«Արդար Հայաստան» կուսակցության առաջին համարը՝ փաստաբան Նորայր Նորիկյանը, ունի ավելի քան 14 մլն դրամ ու 13 հազար դոլար։ Նրա եկամուտները ձևավորվել են փաստաբանական գործունեությունից՝ հաշվետու տարում շուրջ 25 մլն դրամ։ Ըստ հայտարարագրի՝ Նորիկյանն ունի երկու ավտոմեքենա՝ 1999-ի արտադրության «Մերսեդես» ու 2012-ի՝ «Լեքսուս»։ Նա ունի նաև բնակարան և ոչ բնակելի տարածք Երևանում, ինչպես նաև հողամսեր երկու մարզում։

Վիկտոր Մնացականյան. ևս մեկ հարուստ թեկնածու

Հաղթանակ կուսակցության առաջին համարը Երևանի Կենտրոն վարչական շրջանի նախկին ղեկավար Վիկտոր Մնացականյանն է։ Նա ևս ամենահարուստ թեկնածուների շարքում է, ունի մեկ տուն Դիլիջանում, 2018-ի արտադրության «Վոլվո» մակնիշի մեքենա, ինչպես նաև 18 տոկոս բաժնեմաս «Վիկտորիա կոնցեռն» ընկերությունում։ Ըստ հայտարարագրի՝ հաշվետու տարում նա եկամուտ է ստացել «Սկևռա» քաղաքային պլանավորման ինստիտուտից՝ 511 հազար դրամի չափով։ Մնացականյանի դրամական միջոցները կազմել են 43 մլն դրամ ու 270 հազար դոլար։

Նելլի Հարությունյան. հարուստ կին թեկնածուն

Քաղաքապետի կին թեկնածուններից՝ «Ուժը հայրենյաց» կուսակցության առաջին համարը՝ Նելլի Հարությունյանն ունի ավելի քան 1,5 մլն դրամ, 5 000 եվրո ու 10 հազար դոլար։ Նրա եկամուտները կուտակվել են «Հայաերոնավիգացիա» ՓԲԸ-ից՝ հաշվետու տարում ավելի քան 10 մլն դրամ, թոշակից՝ շուրջ 4 մլն դրամ և «Արդշինբանկի» փոխառություններից՝ ավելի քան 40 մլն դրամ։ Տիկին Հարությունյանը Երևանում ունի 3 բնակարան ու ավտոկայանատեղի։ Նա վարում է 2008-ի արտադրության «Նիսսան տիդա»։

Տիգրան Խզմալյան ու Արման Ղուկասյան. 300 հազարական դրամ ունեցող թեկնածուները

Հայաստանի եվրոպական կուսակցության քաղաքապետի թեկնածուն Տիգրան Խզմալյանը, ըստ հայտարարագրի, ունի ընդամենը 300 հազար դրամ ու մեկ բնակարան Երևանում։ Հաշվետու տարում եկամուտ չի ստացել։

«Հանուն Սոցիալական արդարության» կուսակցության առաջին համարը Արման Ղուկասյանը ևս, ինչպես պարոն Խզմալյանը, միայն 300 հազար կանխիկ դրամ ունի։ Նա եկամուտներ ստացել է Սպուտնիկ Արմենիա լրատվականից՝ շուրջ 2 մլն դրամ ու միջազգային փորձագիտական կենտրոնից՝ ավելի քան 2 մլն ռուբլի։ Հայտարարագրի համաձայն՝ չունի ոչ բնակարան, ոչ էլ մեքենա։

Երվանդ Թարվերդյան. գործարար թեկնածուն

Միացյալ Հայաստան կուսակցության քաղաքապետի թեկնածու, «Արարատ ֆիշ» ընկերության տնօրեն Երվանդ Թարվերդյանը, թեև 50-100 տոկոս բաժնեմասեր ունի 11 ընկերություններում, այնքան էլ հարուստ չէ դրամական միջոցներով՝ ընդամենը 444 հազար դրամ ու 463 դոլար։ Նա 4 ընկերությունից ստացել է աշխատավարձ, ինչպես նաև ավելի քան 26 մլն դրամ եկամուտ իր ընկերության շահաբաժնից։ Պարոն Թարվերդյանն ունի նաև 3 հողամաս Կոտայքի մարզում։

Սուրեն Պետրոսյան. Աղավնոյում տեղափոխված թեկնածուն, որ պայքարում է Երևանում

«Ժողովրդավարական համախմբում» կուսակցության առաջին համարը՝ Սուրեն Պետրոսյանը ունի ավելի քան 5,5 մլն դրամ։ Նրա եկամուտները կուտակվել են պետական կառավարման ակադեմիայի աշխատավարձից՝ 25 հազար դրամ ու ընկերություններից մեկից՝ 9000 եվրո։ Ունի բնակարան Երևանում ու 2008-ի արտադրության «BMW»։ Պարոն Պետրոսյանը նախորդ տարի այս ամսին Աղավնո էր գնացել ընտանիքի հետ՝ հայտարարելով, որ չի լքի Արցախի այդ համայնքը ու թույլ չի տա, որ այն անցնի ադրբեջանական վերահսկողության տակ, սակայն օրեր անց նա դուրս եկավ։ Պետրոսյանը պատճառաբանել էր, թե Աղավնոն համակարգային ձեւով հանձնվում է»։