Ձեր վստահելի աղբյուրը

Արևմտյան երկրները շահարկում են գործարար Եվգենի Պրիգոժինի մահվան թեման, միջադեպին Կրեմլի մասնակցության մասին պնդումները սուտ են։ «Ռիա Նովոստի»-ի փոխանցմամբ, այս մասին հայտարարել է ՌԴ նախագահի մամուլի խոսնակ Դմիտրի Պեսկովը։

«Այժմ, բնականաբար, այս աղետի և ինքնաթիռի ուղևորների, այդ թվում՝ Եվգենի Պրիգոժինի ողբերգական մահվան շուրջ շատ շահարկումներ կան։ Իհարկե, Արևմուտքում այս բոլոր շահարկումները մատուցվում են հայտնի անկյունից ։ Այս ամենը բացարձակ սուտ է», - նշել Է Կրեմլի ներկայացուցիչը։

Նրա խոսքով ՝ ավիավթարի վերաբերյալ փաստերը դեռ շատ չեն, հետաքննությունը պետք է հասկանա ողբերգության պատճառները:

«Նախագահը երեկ, խոսելով այս թեմայով, ասաց, որ սպասում է հետաքննության արդյունքներին, որը կավարտվի տեսանելի ապագայում, և մենք կպարզենք մանրամասները»,- ընդգծել է Պեսկովը։
Կրեմլի ներկայացուցիչը հավելել է, որ հետաքննության արդյունքները կհրապարակվեն բոլոր անհրաժեշտ փորձաքննությունների անցկացումից հետո:

Հիշեցնենք, որ օգոստոսի 23-ին Տվերի մարզի Կուժենկինո գյուղի մոտակայքում ընկել է Embraer Legacy մասնավոր ինքնաթիռը, որը Մոսկվայից Սանկտ Պետերբուրգ էր թռչում: Ինքնաթիռում գտնվող բոլոր տասը մարդը զոհվել են։ Ուղևորների թվում է եղել «Վագներ» խմբի հիմնադիր Եվգենի Պրիգոժինը։