Ձեր վստահելի աղբյուրը

ԱՄՆ Կոնգրեսի Ներկայացուցիչների պալատի որոշ հանրապետականներ հանդես են գալիս նախագահ Ջո Բայդենի իմպիչմենտի գործընթացը սեպտեմբերին սկսելու օգտին, գրում է «Ռիա Նովոստի»-ին՝ հղում անելով «Hill» թերթին:

Ավելի վաղ պատգամավոր Մարջորի Թեյլոր Գրինը հայտարարել էր, որ ԱՄՆ նախագահ Ջո Բայդենի դեմ իմպիչմենտի հետաքննությունը կարող է սկսվել սեպտեմբերին։

«Եթե ոչ հիմա, ապա ե՞րբ: Մենք բավականաչափ ապացույցներ ենք հավաքել՝ իմպիչմենտ իրականացնելու համար»,- ասել է ԱՄՆ Ներկայացուցիչների պալատի անդամ, Հարավային Կարոլինա նահանգից հանրապետական Ռալֆ Նորմանը։

Ընդ որում, ինչպես նշում է թերթը, որոշ հանրապետականներ տատանվում են՝ հայտարարելով, որ դեռ պատրաստ չեն քննարկել իմպիչմենտի հարցը։

«Իմպիչմենտի ընթացակարգի շրջանակներում հետաքննություն իրականացնելու համար մենք պետք է ունենանք լուրջ հանցագործության կամ օրինազանցության հստակ ապացույցներ, այլ ոչ թե պարզապես ենթադրություններ: Մենք պետք է ավելի կոնկրետ ապացույցներ ունենանք այդ ճանապարհով գնալու համար», - Hill-ին տված հարցազրույցում ընդգծել է Ներկայացուցիչների պալատի անդամ, Նեբրասկա նահանգից հանրապետական Դոն Բեկոնը։

Ավելի վաղ ԱՄՆ Ներկայացուցիչների պալատի խոսնակ Քևին Մաքքարթին հայտնել էր, որ հանրապետականների հավաքած տեղեկատվությունը թույլ է տալիս բարձրացնել Բայդենի իմպիչմենտի հարցը: Մաքքարթին հայտարարել է, որ Բայդենի և նրա որդու՝ Հանթերի կոռուպցիոն գործունեությանը ենթադրյալ ներգրավվածության հետաքննությունը թելադրում է իմպիչմենտ նախաձեռնելու անհրաժեշտությունը։