Ձեր վստահելի աղբյուրը

«Հրապարակ» թերթը գրում է.

«Որոշ տեղեկություններով, առաջիկայում «Ապրելու երկիր» կուսակցությունը նախատեսում է լյուստրացիա անցկացնել Երևանի ընտրություններին մասնակցող ուժերի շրջանում: Պատրաստվում են կոչ անել, որ հրապարակային հայտարարեն, թե բացառում են ՔՊ-ի հետ հետընտրական համագործակցությունը: Ավելի կոնկրետ՝ ավագանու կազմից քաղաքապետի ընտրության ժամանակ բացառում են ՔՊ-ի թեկնածուին ընտրելը։

Տևական ժամանակ է՝ «Ապրելու երկիրը» հանդիպում-քննարկումների մեջ է մյուս ուժերի հետ, որ Հռչակագիր ստորագրեն, որտեղ կամրագրեն, որ պատրաստ են պայքարել ՔՊ-ի դեմ, սակայն դա չի հաջողվում` մասնակցող ուժերը հրաժարվում են նման փաստաթուղթ ստորագրելուց: Հիմա «Ապրելու երկիրը» մտադիր է հրապարակային «դրդել», որ արտահայտվեն և բացահայտեն իրենց դիրքորոշումը, որպեսզի  հանրությանը պարզ դառնա, թե որ ուժն է կեղծ ընդդիմադիր ՔՊ-ին, որը` իրական։

ԱԵ համահիմնադիր Մեսրոպ Առաքելյանը չցանկացավ գաղտնազերծել, թե որ ուժերի հետ են հանդիպել, և ինչու հուշագիրը գլուխ չի գալիս: Նա ասաց, թե հուշագիրն այնքան էլ կարևոր չէ, մասնակից ուժերը կարող են հայտարարությամբ հանդես գալ․ «Այո, մի քանիսի հետ հանդիպումներ ունեցել ենք, որոնք շարունակվում են, բայց քանի դեռ չկա վերջնական պատկեր, կգերադասեմ չխոսել»: Առաքելյանը նաև շեշտեց․ «Էական չէ հուշագրի առկայությունը, էական է բովանդակությունը, որ բացառում են ՔՊ-ի հետ որևէ համագործակցություն։ Այդ  դիրքորոշումը մեզ չէ պետք, այլ՝ հանրությանը։

Ի վերջո, հանրությունը պետք է իմանա, թե որ ուժերն են գնում ՔՊ-ին իշխանազրկելու Երևանում, որոնք՝ ոչ, և կատարի ընտրություն։ Հետևաբար, դա կլինի փաստաթղթի տեսքով, թե հայտարարության՝ դա պետք է տեղի ունենա»։

Մանրամասները թերթի այսօրվա համարում