Ձեր վստահելի աղբյուրը

«Երեկ, երբ ադրբեջանական բեռնատարները մոտեցել են Ասկերանի մատույցներին, որոշակի բանակցություններ են տեղի ունեցել ռուս խաղաղապահների հետ»,- ասուլիսում ասաց Արցախի Հանրապետության Ազգային ժողովի նախագահ Դավիթ Իշխանյանը՝ անդրադառնալով երեկ Ադրբեջանի կողմից Ակնա-Ստեփանակերտ ճանապարհով Արցախ «հումանիտար» բեռներ տեղափոխելուն, երբ ադրբեջանական բեռնատարները հասել են խաղաղապահների տեղակայման վայրի մոտ։

«Ռուս խաղաղապահների հրամանատարի փոխարինողը նոր է ժամանել Արցախ  և դեռևս քաջածանոթ չէ ընդհանուր ներքին կացությանը: Կան որոշ դրվագներ, որ անհրաժեշտ է, որ ռուսական կողմն ավելի լավ տեղեկացված լինի։ Բայց նրանք, որոնք այստեղ են, զորակազմի համապատասխան պաշտոնյաները, վստահ եմ՝ շատ լավ տեղեկացցված են մեր և ադրբեջանական կողմի մոտեցումներին:

Այս քննարկումները դեռևս որևէ արդյունք չեն տվել, համենայնդեպս, ռուս խաղաղապահների առաջարկը, որ հնարավորություն տրվի մեքենաների մուտքը Արցախի Հանրապետության տարածք, որևէ արդյունք չի տվել:

Արցախի իշխանությունների, համապատասխան պատախանատոների կողմից միջոցներ են ձեռնարկվել և այդ քննարկումները դեռևս ընթացքի մեջ են: Դրանք ավարտված չեն, այստեղ շատ կարևոր է  Արցախի ընդհանուր դիրքորոշումը և ռուսական կողմի համապատասխան բացատրություններ տալը»,-ասաց Իշխանյանը:

Նրա խոսքով, ռուսական կողմը ևս պետք է տեղեկացված լինի այն ընդհանուր իրավիճակին, որն առկա է, և այն տեսակետներին, որոնք ունի արցախյան կողմը. «Ուզում եմ հույս հայտնել, որ այդ բանակցությունները փոխըմբռնման մթնոլորտում էլ կավարտվեն և կունենան իրենց տրամաբանական ավարտը: Կարծում եմ, քննարկումները կշարունակվեն և հավանաբար մեր սպասելիքները պետք է, որ արդարանան»,-ասաց Արցախի ԱԺ նախագահը: