Ձեր վստահելի աղբյուրը

«Ցավոք, պետք է նշեմ, որ վերջերս մեր իրականացրած մի հետազոտության արդյունքում 7 տարեկան երեխաների շրջանում հայտնաբերեցինք, որ մեր երեխաների ամեն 4-րդն ավելցուկային քաշ ունի»,-գործադիրի նիստում հայտնեց առողջապահության նախարարի տեղակալ Լենա Նանուշյանը:

Նա հայտարարեց, որ դպրոցական տարիքից երեխաներին պետք է սովորեցնեն առողջ սնվել, ծնողներին էլ հորդորեն զերծ պահել երեխաներին հեռուստատեսությամբ և այլ միջոցներով վնասակար ուտելիքի գովազդից:

Նիկոլ Փաշինյանն էլ հավելեց, որ եթե հետազոտություն արվի, կպարզվի, որ ամեն 4-րդ երեխա չունի խաղահրապարակ, դպրոցում չկա մարզասրահ, մարզասրահում չկա մարզական գույք, և որ ամեն 4-րդ երեխա կյանքում լողավազան չի տեսել:

Նա ասաց, որ սեփական փորձով գիտի՝ մարզերում երեխաները ամառը լողալու համար շատ հաճախ ոտքով կամ ամենագնաց մեքենաներով 7-8 կմ վտանգավոր ճանապարհ են կտրում, որպեսզի լողալու հասանելիություն ունենան:

«Ամեն երեխա Հայաստանում պետք է ունենա լողավազանին հասանելիություն, մարզասրահին պետք է ունենա հասանելիություն, խաղահրապարակին պետք է ունենա հասանելիություն»,-ասաց Փաշինյանը: