Լիազորված տնտեսական օպերատորը մաքսային անցակետում հերթ չի կանգնի

Տնտեսություն 13:45 31/08/2023 Հայաստան

Լիազորված տնտեսական օպերատորը մաքսային անցակետում հերթ չի կանգնի

«Այս որոշմամբ մենք ևս մենք նախադրյալ ենք ստեղծում ՀՀ-ում Լիազորված տնտեսական օպերատորի ինստիտուտի զարգացման համար»,-կառավարության նիստում հայտնեց ՊԵԿ նախագահ Ռուստամ Բադասյանը:

Նա փորձեց մատչելի ներկայացնել նախագիծը՝ ասելով, որ Լիազորված տնտեսական օպերատորը հատուկ կարգավիճակ է, որը մաքսային մարմնի կողմից տրվում է տնտեսական սուբյեկտին, եթե այդ սուբյեկտը նվազ ռիսկայնություն է ներկայացնում մաքսային իրավախախտումների տեսանկյունից, և այդ կարգավիճակը հնարավորություն է տալիս տնտեսվարողին՝ օգտվել մաքսային մի շարք պարզեցված ընթացակարգերից:

Նա հայտնեց, որ պարզեցված ընթացակարգերով տնտեսվարողին կընձեռվի արտահերթ սպասարկման հնարավորություն, ինչը նշանակում է, որ սահմանային անցման լիազորված տնտեսական օպերատորի կարգավիճակ ունեցող սուբյեկտը հերթ չի կանգնի:

«Երկրորդ՝ իրենք չեն օգտվելու ժամանակավոր պահպանության պահեստներից, այսինքն՝ սահմանային անցման կետերից կարող են իրենց ապրանքը տանել և պահպանել իրենց պահեստում: Ռիսկի պրոֆիլներից շատերը չեն կիրառվելու, այսինքն՝ այն պրոֆիլները, որոնցով մաքսային մարմինը որոշում է կանաչ, կարմիր և դեղին ընթացակարգերը, չեն կիրառվելու այս սուբյեկտների նկատմամբ, և մաքսային մարմինը ապահովելու է մշտական կապ և խորհրդատվություն այս սուբյեկտների համար»,-ասաց Բադասյանը:

Նա նաև նշեց, որ հետագա փուլերում ևս 2 պարզեցված ընթացակարգ պատրաստ են ներդնել, որով մաքսային մարմնի հետ կապը ընդհանրապես կբացակայի:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: