Ձեր վստահելի աղբյուրը

«Կարող է տարօրինակ հնչել, բայց մենք պետք է երեխայի սահմանը հստակ գծենք՝ որտեղ է ավարտվում երեխան և որտեղ է սկսվում հասուն մարդը»,- կառավարության նիստում հայտարարեց Նիկոլ Փաշինյանը:

Նա հիշեցրեց, որ ՀՀ օրենսդրության համաձայն 18 տարեկան անձը չափահաս քաղաքացի է և հայտարարեց, թե սոցիալ-հոգեբանական մակարդակում այդ խնդիրը չեն լուծել:

«Շատ վաղուց իմ ականջը ծակում է այն հանգամանքը, որ գրեթե համատարած բանակում ծառայող զինվորների մասին խոսելիս ասում են՝ երեխաները, երեխաները, երեխաները:

Մենք այդ մարդկանց վրա երկրի անվտանգության ապահովման ֆունկցիան ենք դրել և իրեն կոչում ենք երեխա՞: Եթե իրեն երեխա ենք համարում, ուրեմը չպետք է զորակոչենք»,-ասաց Փաշինյանը:

Նրա խոսքով՝ ՀՀ պաշտպանության նախարարի և ԳՇ պետի առաջ խնդիր է դրել, որպեսզի արձանագրեն, որ բանակում երեխա չկա, այլ զինվորներ են:

«Մեր հանրության մեջ սոցիալ-հոգեբանական խնդիր կա: Եթե այսպես գնա, կասենք՝ 35 տարեկան երեխա, 45 տարեկան երեխա, 63 տարեկան երեխա, վաղ կենսաթոշակային տարիքի երեխա: Սա հումոր չէ, այստեղ շատ լուրջ խորը հիմնահարցեր կան»,-հայտարարեց Նիկոլ Փաշինյանը:

Նա ԿԳՄՍ նախարարի և կառավարության մյուս անդամների առաջ խնդիր դրեց հստակ գծել երեխայի սահմանը:

Հիշեցնենք, որ «երեխա» ձևակերպումը հիմնականում օգտագործում են պատերազմում զոհված, կամ անհետ կորած զինվորների ծնողները՝ խոսելով իրենց զավակների մասին: