«Ժողովուրդ». Շինթույլտվությունների տեղատարափ՝ հեղափոխականների օրոք
«Ժողովուրդ» թերթը գրում է.
«Քաղաքը փոշու մեջ է, իսկ իշխանության վերնախավը քարոզարշավ է անում։ 2018 թվականից մինչև 2023 թվականը Հայաստանում ավելացել են շինարարության ծավալները։ 2018 թվականի հաշվարկով՝ Հայաստանի ամբողջ տարածքում շինարարության ծավալները կազմել են 435 մլն 803 հազար դրամ։ 2022 թականին այդ թիվը աճել է՝ դառնալով 541 մլն 110 հազար դրամ։
Այսինքն՝ նորելուկ իշխանությունները քաղաքացիներին իբրև թե լավություն անելու և նրանց աչքը մտնելու համար աջ ու ձախ շինթույլտվություններ են բաշխել։ Ամեն առիթով պարծենում են, թե ստեղծել են աշխատատեղեր, սակայն այդ աշխատատեղերը վնասում են հա՛մ բնությունը, հա՛մ մարդկանց առողջությունը:
Հեղափոխական իշխանությունները Երևանում 2018 թվականից մինչև 2023 թվականը թվով 157 շինթույլտվություն են տվել 100-ից ավելի կազմակերպությունների։ Այս շինթույլտվությունները տրված են հիմնականում բնակելի շենքեր կառուցելու համար։ Սա՝ այն դեպքում, երբ Հայաստանում բնակչության կեսն ապրում է Երևանում. Հայաստանում բնակչությունը խիստ ուրբանիզացված է։ Այսինքն՝ գյուղերը դատարկվում են, իսկ քաղաքում ավելանում են թանկարժեք էլիտար շենքերը, որոնք վաճառվում են անասելի թանկ գներով։
Հիշենք նաև այն փաստը, որ Մարությանի ղեկավարության օրոք, կառուցապատումների թույլտվությունների դիմաց, ձեռք էին բերվել աղբատար մեքենաներ։ Կասկածելի է, թե նրանից հետո էլ ինչի դիմաց են իշխանությունները ծախել Երևան քաղաքի մայթերն ու ազատ տարածությունները։ Սա դեռ բավարար չէ. Երևանի քաղաքապետարանը նախընտրական թոհուբոհում արագ-արագ քանդում է քաղաքացիների իբրև անօրինական շինությունները՝ առանց նրանց այդ մասին ծանուցելու։ Այսինքն՝ ով ըմբոստ է, ընդդիմախոս Փաշինյանի իշխանությանը, նրանց շինարարությունները քանդվում են ամենատարբեր անհեթեթ հիմնավորումներով, իսկ ովքեր քծնում են, ամենաանօրինական շինարարություններն են շարունակում:
Երևանում կա օդի աղտոտվածության լուրջ խնդիր և կուտակված փոշու ամպեր, սակայն և՛ կառավարությունն է լռում, և՛ Երևանի քաղաքապետարանն ու բնապահպանները: Վերոնշյալ շինթույլտվությունները տրվել են այնպիսի խոշոր ընկերությունների, ինչպիսին է «Գրանդ տոբակո» ՍՊԸ-ն, որը պատկանում է Վարդանյան եղբայրներին։
Հիշեցնենք, որ «Գրանդ տոբակո» ընկերությունը դեռ այս տարվա ապրիլին ազատվել է 8.6 մլրդ դրամի մաքսատուրքից։ Ըստ նախագծի հիմնավորման՝ ընկերության կողմից ներմուծվող հումքը նախատեսվում է օգտագործել ծխախոտի արտադրության համար։ Մյուս կազմակերպությունը «Միկշին» ՍՊԸ-ն է, որը 2018 թվականին, Կառավարության որոշմամբ, պատրաստվում էր լեռնադահուկային համալիր կառուցել Լոռու մարզում, սակայն 2019 թվականին այդ որոշումը համարվեց ուժը կորցրած, և ծրագիրը չեղարկվեց։
«Միկշին» ՍՊԸ-ն պատկանում է ՀՀ Ազգային ժողովի նախկին պատգամավոր Վահան Հարությունյանի եղբորը՝ Տիգրան Հարությունյանին, ԴԱՀԿ ծառայության նախկին պետ Միհրան Պողոսյանի քեռու՝ Միխաիլ Հարությունյանի որդուն։
Հաջորդիվ կներկայացնենք, թե էլ որ ընկերություններին են Երևանում շինթույլտվություններ տրված»։
Մանրամասները թերթի այսօրվա համարում
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
