Ձեր վստահելի աղբյուրը

«Սեպտեմբերի երկուսը մեր ազգի գիտակից մասսայի համար ամենակարևոր օրերից մեկն է, որովհետև մեր պատմական հայրենիքի ամենավառ կտորը կարողացավ իր իրավունքները պաշտպանելու այս միջոցը գտնել և ստանալ անկախության գրեթե այն աստիճանը, որի մասին երազում էին»,-Panorama.am-ի հետ զրույցում ասաց ՀՀ ԳԽ 1990-1995թթ. Արցախի հարցերով հատուկ հանձնաժողովի նախագահ Սեյրան Բաղդասարյանը։

Վերջինս նշեց, որ բացարձակապես չի կիսում այն մոտեցումը, որ ՀՀ քաղաքացիներն ու իշխանությունը պետք է կենտրոնանան ինչ-որ ֆիզիկական թվի, սահմաններով գծված պետության հասկացողության վրա և դրա հիմքով շարժվեն իրենց քաղաքականությամբ։

«Ես համարում եմ, որ առաջին իսկ օրվանից պետք է Հայաստան-Արցախը միավորվեր և այդ ճանապարհով ընթանար, սակայն ընտրվեց այլ ճանապարհ՝ Արցախի ինքնորոշումը, անկախության հռչակումը, և երկար տարիների այն դեգերումները, թե ո՞վ և ինչպե՞ս կճանաչի դա»,-այն հարցին ի պատասխան, թե ինչպե՞ս պետք է լուծվի Արցախի խնդիրը, ասաց Բաղդասարյանը։

Հարցին, թե ինչպե՞ս է գնահատում ՀՀ ներկայիս իշխանության գործիքակազմը՝ Արցախին աջակցելու հարցում, պատասխանեց. «ՀՀ իշխանությունների ներկայիս քայլերը՝ ուղղված Արցախին, անշուշտ բավարար չեմ գնահատում, իրենք ևս գիտեն, որ բավարար չէ, խիստ անբավարար է։

Բավարարության աստիճանն իր հետ պետք է բերեր այն կապը, որը Հայաստանն ու Արցախն ունեին նույնիսկ մինչև անցած տարվա նոյեմբերյան շրջափակումը։ Հիմա այն, ինչ-որ արվում է, արվում է շտապօգնության ճիգերով, որոնք տեղ չեն հասնում հայտնի պատճառով»։

Սեյրան Բաղդասարյանն այս ամենը որակեց իբրև միջազգային փոփոխությունների արդյունք. «Ռուսաստանի դիրքորոշումների մեջ կան փոփոխություններ, որը մեր գործող իշխանությունը հաշվի չէր առել, կամ չէր սպասում, այլ միջազգային դերակատարների կողմից կատարվող քայլերի հետ ավելի մեծ հույսեր էինք կապում, քան իրականում ստացանք։

Ադրբեջանն ուզում է հասնել առանց պատերազմի, Նախիջևանի օրինակով Արցախի հայաթափման, որը պետք է օր առաջ կանխվի։

ՀՀ որևէ իշխանություն պարտավոր է անել առավելագույնը՝ կազմակերպել ամբողջ հայության ներուժը, և եթե սա չի արվում իշխանության կողմից։ Եթե ոչ, քաղաքականության մեջ մի պարզ սկզբունք կա ՝ չես կարող դու անել, տեղդ զիջիր նրան, ով կարող է։

Եթե մենք կորցնենք Արցախը, մեր սերունդները մեզ սա չեն ներելու»։

Մանրամասն՝ տեսանյութում։