Ձեր վստահելի աղբյուրը

«Զիջումների ոչ մի տեղ չկա, այս պրոցեսը շատ կանխատեսելի էր, և մենք չպետք է ձևացնենք, թե մեկ օրում դա հայտնաբերեցինք։ Սա նոյեմբերի 9-ից հետո մեր բազմաթիվ սխալ քայլերի արդյունքն էր, որ Հայաստանն արեց»,- Երևանում Արցախի մշտական ներկայացուցչության դիմաց լրագրողների հետ զրույցում ասաց «Այլընտրանքային նախագծեր» խմբի համահիմնադիր Վահե Հովհաննիսյանը:

Նա ընդգծեց, որ մեր այսօրվա վիճակը 90 տոկոսով մեր սխալ քայլերի արդյունքն է:

«Ի՞նչ է պետք անել. հանձնվել, նշանակում է կորցնել ամեն ինչ,  լինել անգրագետ, արկածախնդիր, նշանակում է նույնպես կորցնել ամեն ինչ: Այստեղ պետք է հասկանալ, թե Հայաստանն ինչ պետք է հակակշռի: Այո, ճնշումներ կան, և, սովորաբար, ճնշում են թույլերի վրա: Ե՛վ Արևմուտքը, և՛ Ռուսաստանն ուզում են, որ խնդիր չլինի այս տարածաշրջանում, որովհետև իրենց գլուխը խառն է այլ բաներով, և հարցերը լուծելու համար բնական է, որ պետք է ճնշեն թույլ կողմին։

Հիմա շատ կարևոր է, որ Հայաստանում լինեն փոփոխություններ, որոնք կբերեն բանակցային նարատիվի փոփոխության»,- ասաց Վ. Հովհաննիսյանը։

Նա նշեց, որ բանակցային այս բովանդակությունը բերում է երկու բանի՝ պատերազմի և հայրենազրկման. Հայաստանի անելիքն այդ երկու պարզ գաղափարների կասեցնելն է՝ չլինի պատերազմ և չլինի հայրենազրկում։

«Այս առումով ողջունում եմ Արցախում տեղի ունեցող փոփոխությունները, դա ուշացած էր, բայց շատ կարևոր։ Շատ կարևորում եմ Հայաստանում նոր, սոլիդ իշխանություն ունենանք։ Կրկնում եմ՝սոլիդ իշխանություն, քանի որ այստեղ արկածախնդրությամբ, անելիքի չիմացությամբ իշխանության գալը վտանգավոր է։

Այն լղոզված, կեղտոտ վիճակը, որ կար Արցախում, հիմա փոխվում է, նույն փոփոխությունները պետք է լինեն նաև Հայաստանում։ Մեզ համար վտանգավոր է և՛ գործող իշխանությունը, և՛ արկածախնդիր, իրավիճակը ճիշտ չհասկացող որևէ այլ իշխանություն»,- ասաց Վահե Հովհաննիսյանը։