Ձեր վստահելի աղբյուրը

«Հրապարակ» թերթը գրում է.

«Իշխանական աղբյուրներն ասում են, որ ԱԺԲ-ն կամ, այլ կերպ ասած՝ «Սասնա ծռերը», առաջին անգամ չէ, որ սադրում է ՔՊ-ականներին ինչպես եղավ նախօրեին Մալաթիա-Սեբաստիա համայնքում, որտեղ քաշքշուկ տեղի ունեցավ, ապա մարդիկ բերման ենթարկվեցին ոստիկանություն։

ՔՊ-ականները պատմում են, որ մոտ 15 օր առաջ «ծռերը»՝ կրկին իրազեկման ակցիա իրականացնելիս, կարճատև կանգառ են արել ՔՊ-ի Մալաթիայի նույն ենթաշտաբի դիմաց և վիրավորական արտահայտություններ հնչեցրել իշխանությունների, հատկապես` Նիկոլ Փաշինյանի հասցեին, սակայն ՔՊ-ականներն այդ անգամ չեն տրվել սադրանքներին, քանի որ կանգառը եղել է կարճատև, և «ծռերը» շուտ են հեռացել:

ՔՊ-ական մեր զրուցակցի խոսքով, նախօրեին նրանք միտումնավոր երկար են կայանել, հանդիսավոր կանգնել ՔՊ-ի պաստառի առջև և ոչ թե իրազեկման ակցիա, այլ մինի-միտինգ արել, բացականչելով՝ «նարկոման», «դավաճան» իշխանություններ:

Իսկ երբ սկսել են հասցեական Փաշինյանին քննադատել, շտաբի ներսում չեն կարողացել հետ պահել թաղապետ Արման Բարխուդարյանին, ով դուրս է եկել` սպառնացել, թե ոստիկանություն կկանչի, ապա ձեռնամարտի նետվել։ Հավանաբար մտածել է` ավելի լավ է ծեծկռտուքի մեջ ընկնեմ, խայտառակվեմ, քան թե Նիկոլ Փաշինյանն իմանա, որ իրեն չեմ պաշտպանել, ու պաշտոնից ազատի»։

Մանրամասները թերթի այսօրվա համարում