Ձեր վստահելի աղբյուրը

«Առաջին դասագրքերն երկուշաբթի օրը, այսինքը՝ փաստացի սեպտեմբերի 1-ից հետո առաջին աշխատանքային օրը մտել են դպրոցներ՝ 5-րդ և 7-րդ դասարանի տարբեր դասագրքեր»,- ԱԺ նույնանուն մշտական հանձնաժողովում հայտնեց ԿԳՄՍ նախարար Ժաննա Անդրեասյանը:

Նախարարն ասաց, որ հենց այդ օրը Կաթնաղբյուրի դպրոցում աշակերտների մոտ տեսել է այդ դասագրքերը:

«Մենք պլանավորում ենք, որ մինչև ամսվա վերջ մյուս դասագրքերի թղթային տարբերակները նույնպես կլինեն դպրոցներում, վաղը գրքերի նոր խմբաքանակներ նույնպես կուղարկվի դպրոցներ: Կարծում եմ, որ մինչև այս ամսվա վերջ մենք բոլոր դասագրքերը կունենանք»,-հայտարարեց Անդրեասյանը:

Նա նշեց, որ էլէկտրոնային տարբերակները կան և տեղեկացրեց, որ կարգադրել են, որ դրանց անհասանելիության դեպքում պատճենահանումը պետք է կազմակերպեն դպրոցները, այլ ոչ թե ծնողները:

«Կարծում եմ, որ սա այն փոքր դժվարությունն է, որը բոլորս պետք է հասկանանք և անցնենք դրանով, որովհետև շատ կարևոր փոփոխություններ ենք իրականացնում: Որպեսզի պարզ լինի՝ ասեմ, որ միայն տպագրության մի քանի մրցույթի արդյունքում ավելի քան 60%-ի արդյունավետության բարձրացում ենք ունենում: Սա միայն տպագրության մասին եմ ասում, բայց մենք գնացել ենք նաև նոր դասագրքերի ստեղծման, որը երկրում չէր իրկանացվել շուրջ 15 տարի և կարծում եմ, որ բոլորս պետք է ունենանք համբերություն, հասկանում ենք, որ դասագրքերը կրթության համակարգի անբաժանելի մասն են  և մեկ օրում չենք ձևավորելու իդեալական դասագրքեր»,-հայտարարեց Ժաննա Անդրեասյանը:

Նա հայտնեց, որ այս փուլը դիտարկում են նաև փորձարկում և դասարաններում դրանք օգտագործելուց հետո ուշադրություն կդարձնեն առաջացած հարցերին և դրա արդյունքում կլրամշակեն դասագրքերը: