Ձեր վստահելի աղբյուրը

Մեծ Բրիտանիայի թագուհի Եղիսաբեթ II-ի մահվան առաջին տարելիցի նախօրեին բրիտանական  ընկերություններից մեկը ներկայացրել է մի քանի կիլոգրամ կշռող հսկայական հուշադրամ, որի երկու կողմերում հազարավոր ադամանդներ են դրված:

«Ստեղծվել է արտասովոր հուշադրամ՝ նշելու Նորին Մեծություն թագուհի Եղիսաբեթ II-ի մնայուն ժառանգությունը», - Ռիա Նովոստիի փոխանցմամբ՝ հայտնել է ընկերությունը՝ X սոցիալական ցանցում (նախկինում՝ Twitter):

Այն իրենից ներկայացնում է «Թագ»՝  երկու կողմից զարդարված ավելի փոքր ոսկե մետաղադրամներով և ադամանդներով: Դարձերեսի վրա ոսկուց պատկերված է Եղիսաբեթ II-ի վերջին դիմանկարը , որի շուրջը   հազարավոր ադամանդներ պատկերում են  Միացյալ Թագավորության դրոշը։ Դիմերեսը զարդարված է չորս մետաղադրամներով, որոնք կրում են թագուհու ավելի վաղ դիմանկարները, որոնք ևս շրջապատված են թանկարժեք քարերով։

Հուշադրամի ստեղծմանը մասնակցել է 8 երկրի 83 մասնագետ։ Դրա համար պահանջվել է ամենաբարձր ստանդարտի 3,61 կգ ոսկի և 6426 ադամանդ, ասվում է ընկերության կայքում:

Ինչպես հաղորդում է Sky News-ը, հուշադրամը բասկետբոլի գնդակի չափ է և գնահատվում է մոտավորապես 18,5 միլիոն ֆունտ ստեռլինգ: Վաճառվելու դեպքում այն ​​կարող է դառնալ աշխարհի ամենաթանկ մետաղադրամը, նախորդ ռեկորդը պատկանում էր Double Eagle մետաղադրամին։

Հիշեցնենք, որ 2022 թվականի սեպտեմբերի 8-ին Շոտլանդիայում 96 տարեկան հասակում մահացավ  Մեծ Բրիտանիայի թագուհի Եղիսաբեթ II-ը, որը երկիրը ղեկավարել է ավելի քան 70 տարի։