Ձեր վստահելի աղբյուրը

«Քանի որ մեզ դեռ սպասվում է կալանքի միջնորդության քննարկում, դրա համար չեմ կարող մեծ ինֆորմացիա տրամադրել այս պահին»,- լրագրողների հետ զրույցում ասաց Արցախյան երրորդ պատերազմում զոհված Մխիթար Գալեյանի հոր` Գարիկ Գալեյանի փաստաբան Վահան Հովհաննիսյանը:

Հիշեցնենք, որ Գարիկ Գալեյանը ձերբակալվել է այսօր։

Փաստաբանի ներկայացմամբ, Գալեյանը ձերբակալվել է երկու արարքի կատարման համար։

«Խուլիգանություն, որն արտահայտվել է նրանով, որ անցյալ տարի գլխավոր դատախազության դիմաց, երբ ծնողները իրավաչափ ակցիա էին իրականացնում, իշխանական սադրիչներից մեկը փորձել էր միջամտել ակցիային և  Գարիկ Գալեյանը իր ձեռքի շշով ջուրը լցրել էր վերջինիս գլխին: Այդ արարքը որակվել է որպես խմբով խուլիգանության կատարում, ընդ որում՝ ինձ համար պարզ չէ, թե խմբի մյուս անդամը ով է, հավանաբար, շիշը: Քանի որ մեղադրանքից պարզ չի դառնում։

Եթե մենք համադրում ենք այդ մեղադրանքի փաստական կողմը մեզ քաջ ծանոթ դեպքի հետ, երբ ԱԺ նախագահը բոլորի ներկայությամբ թքեց  քաղաքացու դեմքին, հասկանում եք, որ այստեղ խուլիգանության մասին  կամ խոսք չկա, կամ  ակնհայտ խտրական վերաբերմունք է, այսինքն  խուլիգանության հոդվածը գրպանում պահված  հոդված է պետության համար՝ մեղադրելու այն անձանց, ովքեր իրենց համար անցանկալի են»,- ասաց փաստաբանը։

Հարցին՝ ինչո՞ւ հիմա, Վահան Հովհաննիսյանը պատասխանեց. «Եթե հայտարարություն անեմ, որ  կապված է քաղաքական պրոցեսների հետ, կրկին կասեն փաստաբանը քաղաքական հայտարարություն է  անում, բայց  եթե իրադարձությունների ժամանակագրությունը դիտարկում ենք, երբ այդ ամեն ինչը սկսվեց, երբ ծողները միացան «Հայաքվեին», երբ հայտարարեցինք, որ միանում են «Մայր Հահայաստան» դաշինքին։  Այսինքն, այդ ամեն ինչը միմյանց հետո փոխկապակցված է»։

Երկրորդ մեղադրանքը, փաստաբանի ներկայացմամբ, իրացնելու նպատակով թմրամիջոց պահելու համար է։

«Անգամ չգիտեմ ինչ անվանում կարելի է  տալ սրան։ Շինծու մեղադրանք, արհեստական մեղադրանք, արհեստական ապացույցներ... բայց հավատացեք, որ  ամեն ինչ իրականում այդպես է»։

Վահան Հովհաննիսյանն ասաց, որԳարիկ Գալեյանը երկու մասով էլ չի ընդունում իրենց առաջադրված մեղադրանքը։

«Գալեյանին կալանավորելու բուռն ցանկություն ունեն, տեսնենք՝ դատավորը ով է, ում է մակագրվում, շատ բան դատավորի անձից է կախված»,- ասաց փաստաբանը։