Ձեր վստահելի աղբյուրը

Հայաստանի տղամարդկանց հավաքականից Ռիյադում ընթացող ծանրամարտի աշխարհի առաջնությունում առաջինը ասպարեզ է դուրս եկել Եվրոպայի չեմպիոն Գոռ Սահակյանը (67 կգ): Այս մասին հայտնում է ՀԱՕԿ-ը։

«20-ամյա մեր պատվիրակը առաջին անգամ մասնակցեց նման խոշոր ստուգատեսի: Գուցե դա էր պատճառը, որ նա իր հնարավորություններից թույլ հանդես եկավ: Գոռը երկու վարժություններում նախապես պատվիրած կիլոգրամները կարողացավ հաղթահարել միայն երրորդ մոտեցումից հետո և  երկամարտի 312 կգ  (142 կգ + 170 կգ ) արդյունքով դարձավ բրոնզե մեդալակիր ու տեղ գտավ պատվանդանի երրորդ աստիճանին: Ի դեպ, պոկում վարժությունից հետո, երբ արժանացավ «արծաթի», հույս առաջացավ, որ նա հաջողությունը կզարգացնի հրումում: Ավաղ, սպասելիքները չարդարացան:

Կարծում ենք շնորհալի ծանրորդը հաջորդ մրցումներում արդեն հաղթահարած կլինի մեկնարկային տենդի արգելքը և բնածին օժտված հայ ծանրորդը իրեն վայել մեդալներ կնվաճի: 

Մեր թիմից հաջորդը, սեպտեմբերի 11-ին, պայքարի կելնեն Ռաֆիկ Հարությունյանը (81 կգ 17. 30 –ին ) և Անդրանիկ Կարապետյանը (89 կգ, ժամը 20. 00 -ին)»,- հայտնում են կոմիտեից։