Ձեր վստահելի աղբյուրը

«Ես հասկանում եմ, որ կրթությունը մի համակարգ է, որտեղ բոլորը կարծիք ունեն ու շահագրգիռ են: Սա շատ լավ է, բայց ամեն դեպքում այն մասնագիտություն է և պրոֆեսիոնալ մոտեցում է պահանջում: Տառուսուցումն ունի իր տրամաբանությունը և քայլերի հերթականությունը: Վստահեք մեր ուսուցիչներին, վստահաբար նրանք կսովորեցնեն մեր երեխաներին տառերն, ինչպես ամեն տառ»,-ԱԺ-ում տված ճեպազրույցում հայտարարեց ԿԳՄՍ նախարար Ժաննա Անդրեասյանը՝ պատասխանելով հարցին, թե առանց դասագրքի առաջին դասարանցիներն ինչպես պետք է սովորեն տառերը:

Լրագրողներից մեկը հարցրեց, թե իրենց մեղավորությունը չե՞ն տեսնում, որ գրքերը երկու ամսի հետո են հասնելու դպրոց:

«Դուք լսո՞ւմ եք ինձ: Դուք լրագրող եք չէ, լրագրողը պետք է հնարավորինս ճշգրիտ լինի իր արտահայտություններում: Դուք ժամկետը, ենթադրում եմ, որ միտումնավոր եք սխալ ասում, որովհետև այն շարունակաբար է կրկնվում, այնպես որ, խնդրում եմ, հարցերի պատասխանները լսեք, նոր հարցեր տվեք,-հայտարարեց Անդրեասյանը և  չպատասխանեց լրագրողի հարցին:

Նախարարը հայտարարեց, որ չի կարծում, թե ունեն լուրջ խնդիր, քանի որ դասագրքերը հասանելի են, իսկ գրքերն ամբողջությամբ դպրոցներ կհասնեն մինչև սեպտեմբերի վերջ:

Նա նաև հայտնեց, որ նախարարության մեղավորությունը չէ ուշացումը և ասաց, որ տպագրության մեջ մեծ փոփոխություններ են արվել, որի արդյունքում գրքերի գները նվազել են 50%-ով:

Անդրեասյանն ասաց, որ փոփոխվել է դասագրքերի տպագրության ընթացակարգերը, որոնք լրացուցիչ ժամանակ էր պահանջում:

Հարցին, թե դսագրքերի ուշացումը ձախողում չի համարում՝ Ժաննա Անդրեասյանն ասաց. «Ես շատ կուզեի, որ երբ դուք այդ գնահատականներն օգտագործում եք, կա՛մ շատ մանրամասն ուսումնասիրած լինեք, որպեսզի անվանեք ձախողում, կա՛մ էլ ես հիմա կսկսեմ ձեզ հարցել տալ և կարծում եմ այդտեղից պարզ կդառնա, որ դուք չգիտեք ձախողել ասելով ինչ նկատի ունեք: Ես չեմ ուզում գնալ այն ճանապարհով, որով հաճախ լրագորղներն են գնում՝ տառակերության»: