Ձեր վստահելի աղբյուրը

«Արամի 60 հասցեում սկսում ենք քանդման աշխատանքները»,-Երևանի քաղաքապետարանի գործակարգավարական խորհրդակցության ժամանակ արձակուրդում գտնվող փոխքաղաքապետ Տիգրան Ավինյանին զեկուցեց Քաղաքաշինության և հողի վերահսկողության վարչության պետի պաշտոնակատար Յակով Ասատրյանը:

Նա հիշեցրեց, որ հունիսի երեքին անօրինական կառույց է իրականացվել Եղիշե Չարենցի տուն-թանգարանի վերևի հարկում, որը հանրային վտանգ է ներկայացնում երրորդ անձանց համար և զեկուցեց, որ արդեն այսօրվանից իրականացնում են վերնահարկի քանդման աշխատանքները:

Փոխքաղաքապետ Տիգրան Ավինյանը  խոսեց մաշտոցի 47 հասցեիի վերնահարկում ապօրինի շինարարության մասին:

Յակով Ասատրյանը հայտնեց, որ արձանագրություն է կազմվել և տվյալ բնակիչը պարտավորվել է  ինքնուրույն քանդել, ապամոնտաժել շինությունը և նրան մեկ-երկու օր ժամանակ կտրամադրվի:

«Պարո՛ն Ասատրյան, մարդ, ով այս շրջանն օգտագործում է արագ-արագ վերնահարկ կառուցելու համար, անվստահելի մարդ է, իր հետ պայմանավորվել պետք չէ: Պետք է քանդել, որովհետև ես չեմ հավատում էդ մարդուն և իր խոստումներին: Եթե նա այս շրջանն օգտագործում է նրա համար, որ այլանդակի Մաշտոց պողոտայի վրա գտնվող մեր շենքերից մեկը, ինքը չի կարա ազնիվ և իր խոսքի տեր մարդ լինի, հետևապես գնացեք հետևեք և քանդեք ինքնուրույն»,-հայտարարեց Տիգրան Ավինյանը:

Հայտնելով, որ նախկինում նախընտրական շրջանում քաղաքային իշխանությունները նախընտրում էին օրինախախտների նկատմամբ ավելի մեղմ գտնվել, մարդկանց քիչ տուգանել՝ Ավինյանն ասաց. «Հակառակը, ես հորդորում եմ ձեզ ավել տուգանել բոլոր խախտումների դեպքերով, որովհետև կյանքը և փորձը ցույց է տալիս, որ շատ տարբեր սուբյեկտներ այս շրջանն օգտագործում են տարբեր ապօրինություններ իրականացնելու համար»:

Նա ասաց, որ բոլոր դեպքերում, երբ կա քաղաքաշինական նորմերի խախտում, փոշի որսացող ցանցերն են բացակյում, պետք է ամեն օր տուգանվեն: