Ձեր վստահելի աղբյուրը

«Դուք  նամակ եք ուղարկել Վլադիմիր Պուտինին։ Մյուսների հետ հեռախոսազրույց եք ունեցել, իսկ Պուտինին նամակ եք ուղարկել։ Արդյո՞ք արդյունավետ միջոց է հեռախոսազանգը նամակով փոխարինելը։ Ես տեսա, որ վերջին Ձեր վերջին եռախոսազանգը Պուտինի հետ եղել է հուլիսի 5-ին։ Ասում եք՝ դրանից հետո իրավիճակ չի փոխվել, բայց սահմանին իրավիճակն ավելի սրվել է, սահմանին կան կուտակումներ»,- ԱԺ-ում հարց ու պատասխանի ընթացքում ասաց «Հայաստան» խմբակցության պատգամավոր Ագնեսա Խամոյանը: 

Պատգամավորը նաև Փաշինյանից հետաքրքվեց․ «Այստեղ ԱԱԾ-ն «վագներականների» է փնտրում և այսօր Զախարովան անդրադարձավ տեղեկություններին, որ  ՀՀ իշխանությունները մտահոգություն ունեն, թե Ռուսաստանը կարող է հեղափոխություն կազմակերպել ՀՀ-ում. Դուք նման մտահոգություն ունե՞ք»։

«Հայաստանի և Ռուսաստանի միջև հարաբերությունների հարցում կողմնորոշվում եմ ռուսաստանցի իմ գործընկերոջ հայտարարություններով, որն ասաց, որ ՀՀ-ի հետ հարաբերություններում խնդիրներ չկան և ինձ հետ հարաբերություններում՝ նույնպես։ Լաչինի միջանցքի արգելափակումից հետո ես 7-8 հեռախոսազանգ եմ ունեցել ՌԴ նախագահի հետ։ Մյուս գործընկերների հետ կամ ոչ մի զրույց չեմ ունեցել կամ ավելի պակաս եմ ունեցել»,- ի պատասխան ասաց Նիկոլ Փաշինյանը։

Ինչ վերաբերում է  «վագներականներին», ապա  Փաշինյանն ասաց, որ իրավապահ մարմինները պարտավոր են արձագանքել մամուլում տեղ գտած հրապարակումներին․ «Որքանով տեղյակ եմ նման հրապարակում եղել է Տելեգրամում և ԱԱԾ-ն ստուգում է այդ տեղեկատվությունը։ Ինչ վերաբերում է մտավախությանը, թե Ռուսաստանը հեղափոխություն կարող է անել, ապա ՀՀ-ում  հեղափոխություն կարող է անել միայն հայ ժողովուրդը»։