Ձեր վստահելի աղբյուրը

Աշխարհում կորոնավիրուսի հիվանդացության աճ է նկատվում, եվրոպական երկրներում նաև հոսպիտալացման դեպքերն են ավելացել։

Վարակիչ հիվանդությունը, կարծեք, հանձնվել չի պատրաստվում։ Դրան էլ շատ դեպքերում նպաստում են կառավարությունները, որոնք ժամանակին  կանխարգելիչ, իրազեկման բավարար քայլեր չեն ձեռնարկում։ Հայաստանն այս առումով բացառություն չէ.  կորոնավիրուսի գոյության մասին, չնայած երկրում արձանագրված  հազարավոր մահերի, գրեթե մոռացել էինք, մինչդեռ հիվանդացության դեպքերը վերջին մեկ շաբաթում ավելացել են։  Սրան զուգահեռ չեն ակտիվացել իրազեկման աշխատանքները։

«Սեպտեմբերի 12-ի դրությամբ  դրան նախորդող յոթ օրերի ընթացքում արձանագրվել է կորոնավիրուսի 71 դեպք, ինչը նախորդ նույն ժամանակահատվածի համամետ աճել է 29 դեպքով։ Թեստերի դրական արդյունքների մասնաբաժինը վերջին 7 օրվա ընթացքում կազմել է 29.1 տոկոս, նախորդ շաբաթվա 28.4 տոկոսի համեմատ»,-Panorama.am-ի հետ զրույցում նման տվյալներ հրապարակեց ԱՆ ՀՎԿԱԿ վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը։

Դեռ երեկ Panorama.am-ը հարցեր էր ուղղել առողջապահության նախարարությանը՝ տեղեկանալու, արդյո՞ք Հայաստանում գրանցվել են օմիկրոնի նոր շտամով հիվանդացութան դեպքեր, ի՞նչ քայլեր են ձեռնարկվում դրանց մուտքը Հայաստան կանխելու համար։ Բայց ողջ օրվա ընթացքում նախարարությունում ժամանակ չգտան հարցերին պատասխանելու համար։ Անահիտ Ավանեսյանը կարմիր ժապավեն էր կտրում։

Քիչ առաջ,  Panorama.am-ի հարցերին պատասխանելուն զուգահեռ, ԱՆ-ից հաղորդագրություն տարածեցին՝ Հայաստանում օմիկրոնի նոր` ակրուքս ենթատեսակի հայտնաբերման մասին։

«Հայաստանում օրերս հայտնաբերվել է օմիկրոնի նոր` ակրուքս ենթատեսակը, որն աշխարհում շրջանառվում էր մայիսից։ Սեքմենավորվման արդյունքում աշխարհում շրջանառվող օմիկրոնի BA.2.86 (Pirola) և EG.5 (Eris) տարբերակները  չեն հայտնաբերվել։ Մենք կարող ենք ասել, որ այսօր քովիդով հիվանդներից շատերը կարող են վարակված լինել ակրուքս ենթատեսակով։ Բայց թե քանիսի մոտ է հենց այդ շտամը, ասել չենք կարող»,-ասաց ՀՎԿԱԿ վարչության պետը։

Վկայակոչելով ԱՀԿ դիտարկումները՝  նա նշեց, որ օմիկրոնի տարբեր ենթատեսակներով հիվանդանալու դեպքում  կլինկական ընթացքի տարբերություններ չկան, գրեթե բոլորն ունեն նույն ախտանշանները։

«Բոլոր դեպքերում հիմնական ռիսկի խումբը 65-ից բարձր մարդիկ են և այն անձինք, որոնք ունեն խրոնիկական հիվանդություններ ու պատվաստված չեն»,-նշեց կենտրոնի ներկայացուցիչը։

Ռոմելլա Աբովյանի խոսքով, սուր շնչառական հիվանդություն ունեցող բոլոր պացիենտները, ըստ ներդրված մեխանիզմի, պետք է թեստավորեն քովիդի նկատմամբ, որպեսզի հնարավոր լինի նրանց վաղ հայտնաբերել, անհրաժեշտության դեպքում ճիշտ բուժօգնություն տրամադրել, քանի որ կորոնավիրուսի ու սուր շնչառական հիվանդությունների դեպքում բուժման տակտիկան տարբեր է։

Աշխարհում այս պահին արագորեն տարածվում է «Էրիս»-ը

Առողջապահության համաշխարհային կազմակերպությունը վերջերս զգուշացրել է կորոնավիրուսի հերթական օմիկրոն-շտամի՝ «Էրիս»-ի (EG.5) արագ տարածման մասին։
ԱՀԿ տվյալներով, շտամը գրանցվել է 2023-ի փերվարի 17-ին, հուլիսի 23-ից ԱՀԿ մասնագետները մոնիտորինգ են իրականացնում հիվանդության, դրա տարածման ու այլնի վերաբերյալ։

Դիտարկումները ցույց են տվել հիվանդության կայուն աճ։ Համաճարակաբանական 29-րդ շաբաթվա ընթացքում (հուլիսի 17-23-ը), EG.5-ի համաշխարհային տարածվածությունը կազմել է 17.4%:

Օգոստոսի 7-ի դրությամբ hիվանդության դեպքեր գրանցվել են 51 երկրներնում։ Դեպքերի մեծամասնությունը՝ 30.6 տոկոսը գրանցվել է Չինաստանում, այդ ցուցանիշով նրան հետևում են ԱՄՆ-ն, Կորեայի Հանրապետությունը, Ճապոնիան, Կանադան, Ավստալիան, Սինգապուրը, Միացյալ Թագավորությունը,  Ֆրանսիան, Պորտուգալիան, Իսպանիան և այլն։
RBC-ն նշում է, որ Մեծ Բրիտանիայում «Էրիս» շտամն արձանագրվել է կորոնավիրուսով հիվանդացած յուրաքանչյուր տասներորդ մարդու մոտ։

Ի՞նչ ախտանշաններ ունի հիվանդությունը

Նոր շտամի ախտանիշները պրակտիկորեն չեն տարբերվում  սուր շնչառական հիվանդությունների կամ կորոնավիրուսի նշաններից։ Լինում է  գլխացավ, հարբուխ, թուլություն, փռշտոց, ցավ կոկորդում, ջերմություն։

 ԱՀԿ-ում չեն բացառում, որ հիվանդության տարածման արագությունն ավելի մեծ լինի, քան նախորդ շտամների դեպքում է, ինչի հետևանքով այն կարող է գերիշխող դառնալ։ Միաժամանակ դեպքերի ընթացքի բարդություններով այն մյուսներից չի տարբերվում։

Չնայած ԱՀԿ-ն այս տարվա մայիսին չեղարկեց համավարակի կարգավիճակը, սակայն հիվանդություն շարունակում է վտանգ ներկայացնել հատկապես տարեց ու քրոնիկ հիվանդություններ ունեցող անձանց համար։

Մասնագետները հորդորում են՝ կորոնովիրուսից զերծ մնալու համար հետևել հիգիենային, պահպանել սոցիալական հեռավարություն, մեծացնել դիմադրողականութունը, ինչպես նաև արդյունավետ միջոց են համարում պատվաստումը։