Ձեր վստահելի աղբյուրը

«Դիտորդական առաքելության ընթացքում հավաքագրվող փաստերը հիմք են հանդիսանալու վիճարկելու  բոլոր պատկան մարմինների անգործությունը, որոնք ի պաշտոնե ունեն վերահսկողության գործառույթներ»,-ՀայաՔվեի հրավիրած ասուլիսում հայտնեց Մենուա Սողոմոնյանը՝ ներկայացնելով Երևանի քաղաքապետերի թեկնածուների քարոզարշավների դիտարկումները:

Ավետիք Չալաբյանն էլ հայտնեց, որ դիտորդական առաքելությունը չի կարող ընտրությունների արդյունքները բողոքարկել, նա միայն կարող է իր հավաքագրած տվյալները ներկայացնել ԿԸՀ-ին , իսկ եթե այդ տվյալները նաև առևերևույթ հանցագործությունների տարրեր են պարունակում, ապա կարող են դիմել դատախազությանը և հաղորդում տալ հանցագործության մասին:

«Բոլոր այն փաստերը, որոնք մեզ հայտնի կդառնան և կարող են հանդիսանալ հիմք քրեական վարույթի համար,  կներկայացվեն ոչ միայն ԿԸՀ, այլև դատախազություն»,- հավելեց Չալաբյանը:

Մենուա Սողոմոնյանն ասաց, որ խախտումներ կան ընտրապայքարին մասնակցող բոլոր թեկնածուների քարոզչական գործընթացներում, բայց իրենց խնդիրն է ի ցույց դնել ընտրապայքարի այն անհավասարությունը, որն այսօր գոյություն ունի և բերեց «Հանրային ձայն»-ի պաստառների օրինակը, որոնցում ՔՊ-ի պաստառների օրինակով, նույնպես չկան օրենքով պահանջվող համապատասխան նշումները:

«Դիտորդական առաքելության նպատակը գործող իշխանությունների կոռուպցիոն սխեմաների և վարչական ռեսուրսի գործադրման արդյունքում առկա իրավիճակն ի ցույց դնելն է և դրա հիման վրա քաղաքացիներին կոչ անել՝ աջակցել թե՛ ընտրախախտումների հայտնաբերմանը, թե՛ առավել ակտիվ մասնակցության դրդել»,-հայտարարեց Սողոմոնյանը և հավելեց. «Այս իշխնության թույլ կետերից մեկը հանրային հնչեղություն ստացող հարցերն են: Լինում է այնպես, որ հանրային հնչեղությունը երբ որ դուրս է գալիս իրենց կանխատեսածից, իրենք ստիպված իրենց ոճի մեջ մեղավորներ փնտրելու, ինչ-որ մեկի վրա  բարդելու մտածողությունից ելնելով, ինչ-որ գործընթացներ են նախաձեռնում: Հետևապաես, պետք է անել այնպես, որ գործընթաց սկսելու պահանջն ստանա հանրային հնչեղություն»:

Լրացնելով գործընկերոջը՝ Չալաբյանը հայտնեց, որ վարչական ռեսուրսի անհամաչափ կիրառելու հնարավորություն ունի ընդամենը մեկ քաղաքական ուժ, որը վերահսկում է Երևանի քղաքապետարանը, ԱԺ-ն, Կառավարությունը, նախագահի  ինստիտուտը, Դատախազությունը:

«Քերական օրենսգրքի 236-րդ հոդվածով մարդուն պարտադրաբար հանրահավաքի տանելը քրեորեն պատժելի է»,-ասաց նա և հավելեց, որ այդ իրավունքից անտեղյակ մարդիկ չգիտեն, որ կարող են հակադրվել այդ վիճակին:

Չալաբյանը հատնեց, որ եթե լինեն պարտադրանքով ՔՊ-ի հանրահավաքին տանելու դեպքեր, ապա կարող են զանգահարել ՀայաՔվեի թեժ գծին՝ 099-888-281, որտեղ դիմողների անանունությունը կպահպանեն, կպաշտպանեն իրենց իրավունքը և հետևողական կլինեն, քանի որ արարքը հանցակազմ է պարունակում:

«Գործող իշխանությունը չունի իրեն վերագրվող կացինը, եթե կկուն՝ քաղաքացին, իրենից չվախենա, իր իրավունքները գիտակցի և հետամուտ լինի դրա պաշտպանությանը»,-ասաց Ավետիք Չալաբյանը:

Անդրադառնալով Նիկոլ Փաշինյանի՝ խաղաղության պայմանագիր կնքելու պատրաստակամության մասին հերթական հայտարարությանը՝ վերջինս ասաց. «Փաշինյանի կնքաց հնարավոր ցանկացած խաղաղության պայմանագիրն այն կոնտուրներով, որի մսին նա խոսում է, Հայաստանի համար լինելու է բացարձակ աղետ և կապիտուլյացիա, որն ամեն գնով պետք է խոչընդոտել և Հայաքվեի նպատակն այդ կապիտուլյացիոն ակտին խոչընդոտելն է»:

Անդրադառնալով Փաշինյանի խոսքին, թե Պրահայում Ադրբեջանի տարածքային ամբողջականության մասին ստիպված է հայտարարել, քանի որ հիմնական դաշնակիցը մենակ է թողել ագրեսիայի ժամանակ՝ Մենուա Սողոմոնյանն ասաց.  «Այդ խոսքերը հիմնավորում են մեր կասկածն այն մասին, որ, փատորեն, սեպտեմբերյան ագրեսիան պետք է, որ կազմակերպված լիներ իր և Ալիևի պայմանավորվածության արդյունքում»: