Ձեր վստահելի աղբյուրը

«Ներկայացված նախագծով նախատեսվում է ԿԳՄՍՆ-ին 2023 թ. պետական բյուջեով կապիտալ ծրագրերի իրականացման համար հատկացված միջոցների միջև կատարել վերաբաշխում 3 մլրդ 134 միլիոն 615 հազար դրամ գումարի չափով»,- կառավարության նիստում հայտնեց ԿԳՄՍ նախարար Ժաննա Անդրեասյանը՝ ներկայացնելով պետական բյուջեից վերաբաշխման հերթական նախագիծը:

Նախարարի խոսքով՝ գումարը կուղղվի 2023 թ. ավարտվող շինարարական ծրագրերի համար, որոնք վերաբերում են 300 դպրոցի և 500 մանկապարտեզի շենքային պայմանների ապահովման ծրագրերին:

Անդրեասյանը հայտնեց, որ մոդուլային դպրոցների կառուցման ծրագրի շրջանակներում կա 25 հաստատություն, որոնցից 2-ի շինարարական աշխատանքներն արդեն ամբողջությամբ ավարտվել են Դեղձուտում և Արգինայում, ևս 9-ինն ավարտվում է ընթացիկ տարի, որոնց համար լրացուցիչ հատկացումներ են նախատեսված  նախագծով:

«Ընդ որում, մոդուլային դպրոցները սպասարկելու են շուրջ 3272 աշակերտի և ծառայելու են ոչ միայն որպես կրթական հաստատություններ,  այլև որպես համայնքային կենտրոններ»,-ասաց ԿԳՄՍ նախարարը և հավելեց. «Մոդուլային մանկապարտեզների կառուցման ծրագրում ունենք 19 հաստատություն, որոնցից 4-ի շինարարական աշխատանքներն ավարտվում են այս տարի, 2-ի մասով նախատեսված են հատկացումներ, որոնք ներառված են այս նախագծում: Ընդհանուր առմամբ, մոդուլային մանկապարտեզները սպասարկելու են շուրջ 2842 նախադպրոցական տարիքի երեխաների»:

Նա տեղեկացրեց, որ նախագիծը վերաբերում է 15 դպրոցի մարզադահլիճի կառուցմանը և 9 դպրոցների մարզադահլիճների վերակառուցմանը:

Ժաննա Անդրեասյանը հայտարարեց, որ մինչև տարեվերջ կավարտվեն նաև 2019-ին մեկնարկած Երևանի մնջախաղի թատրոնի շենքի վերակառուցման աշխատանքները:

Նիկոլ Փաշինյնն է թվարկեց բոլոր դպրոցները և մանկապարտեզները, որոնց վերաբերում է ֆինանսավորումը՝ տեղեկացնելով, որ ծրագիրն իրականացնելու համար 80 նոր հաստիք են ավելացրել քաղաքաշինության կոմիտեում:

Քաղաքաշինության կոմիտեի նախագահ Արմեն Ղուլարյանն է վստահեցրեց, որ մինչև տարեվերջ բոլոր օբյեկտների շինարարությունը կավարտվի: