Ձեր վստահելի աղբյուրը

«Բավականին բարդ գործընթաց է, որևէ մեկը չի ասել, որ խաղաղության կարգավորման փաստաթուղթը հեշտ է տրվելու, քանի որ  բազմաթիվ դրվագներում դեռևս մեր մոտեցումները հեռու են իրարից»,- խորհրդարանական ճեպազրույցների ժամանակ ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը։

Ըստ նրա, հինգերորդ շրջափուլն է, որ Հայաստանն ու Ադրբեջանն առաջարկներով են փոխանակվում, հայկական կողմը ստացել են ադրբեջանական կողմից հերթական  առաջարկների պատասխանը, կուսումնասիրվեն, ըստ այդմ կլինի հետագա պրոցեսը։

«Ոչ մի գործընթաց փակուղում չի գտնվում, որքան էլ բարդ է իրավիճակը, որքան էլ սահմանին ադրբեջանական զորքերի որոշակի կուտակումներ կան»,- ասաց ՔՊ-ական պատգամավորը։ 

Նա ընդգծեց, որ խաղաղության պայմանագրում պետք է  հստակ մեխանիզմներ ու երաշխիքներ լինեն, որոնք կապահովեն ՀՀ տարածքային ամբողջականությունն ու  սուվերենությունը։

«Մինչ այս պահը դեռևս չի հաջողվել  մոտարկել մոտեցումներն այս առումով»,- ասաց Ա. Հովհաննիսյանը։

Ճեպազրույցին ներկա ՔՊ խմբակցության պատգամավոր Արուսյակ Ջուլհակյանն ասաց, որ փոխադարձաբար միմյանց տարածքային ամբողջականությունը ճանաչելու հարցում  բանավոր պայմանավորվածությունը կա, գրավոր ձևակերպումը  ՀՀ-ին չի բավարարում. «Բանավոր պայմանավորվածության մասին եմ խոսում, որը  տեղի է ունեցել 2022 թվականի հոկտեմբերի 7-ին Պրահայում, վերահաստատվել է այս տարվա մայիսին։ Փոխադարձաբար երկու երկրները պայմանավորվել են ճանաչել միմյանց տարածքային ամբողջականությունը բանավոր, բայց գրավոր ձևակերպումը, որը մենք  կարող ենք ամրագրել  խաղաղության պայմանագրով, այս պահի դրությամբ դեռևս Հայաստանին չի բավարարում»։

Նա նշեց, որ Ադրբեջանը միշտ չէ,  որ կառուցողական է լինում, շատ ավելի հաճախ  ապակառուցողական է  լինում։ «Մենք չպետք է մեր բռնած ուղուց հետ կանգնենք, մեր նպատակներից շեղվենք, ու պետք է  շարունակենք աշխատել խաղաղության և  կայունության հասնելու ուղղությամբ»։ 

Խոսելով Ակնայի ճանապարհի բացման մասին, նա ասաց, որ դրա հետ կապված քննարկումները գտնվում են Լեռնային Ղարաբաղի  իշխանության տիրույթում,  Հայաստանը բացառապես Լաչինի միջացքի շուրջ է քննարկումներ ունենում։ 

Հարցին՝ «Արցախի իշխանությունները կիսո՞ւմ են ձեր տեսակետը, որ որպես այլընտրանք չի կարող լինել Աղդամի ճանապարհը», նա ասաց. «Մենք չենք կարող խոսել ԼՂ իշխանությունների անունից, նման իրավասություն չունենք, այդ հարցը պետք է ուղղեք նրանց։ Հայաստանը իր ստորագրության տերն է,  ու Հայաստանը շարունակում է  պնդել Լաչինի միջանցքի ապաշրջափակման ապահովման վրա»։

Հարցին՝ «ասացիք, որ իրավունք չունեք խոսել Ղարաբաղի իշխանությունների անունից, այդ դեպքում Փաշինյանն ինչո՞ւ է ճանաչում Արցախն Ադրբեջանի կազմում», Ջուլհակյանն ասաց. «Նիկոլ Փաշինյանը ՀՀ անունից է խոսում, այսինքն Արցախի անունից չէ, որ ճանաչում է Ադրբեջանի կազմում»։